ايجى ميديا

نشر: 12/3/2014 4:14 ص – تحديث 12/3/2014 4:14 ص

المحزن أنها مكتوبة قبل يناير بعام كامل، ومع ذلك فهى تظلّ شغَّالة، وكنت أظنّها لا تظلّ!

■ ■ ■

خايفْ لا شمسِك من صباحنا تزول

خايفْ نُقَع فى كل عرض وطول

خايف طوفان ييجى ما نلقاش طُول

خايف لا خوفى يشلّنى على طول

لكن حاقول لِك كلمتى وامشى

ويا ربى ماتحكمشى ماتحكمشى

إمتى الزمان يسمح واقول لِكْ لأ

أمّا انتى حَقّا إنتى مالكيش حق

إيدك فى مية وْحاطة إيدى فْ شَقّ

والآه بتطلع منى غنوِةْ عشق

شايلاكى فى عينَيَّا وْعلى رمشى

ويا ربى ماتحكمشى ماتحكمشى

حلمى أشيخ وَاكْبَر وانا مْعاكى

بكلام بليغ أحكى حَكَاياكى

واطلُب إيديكى م اللى ربَّاكى

وتزفّنا عربية ملّاكى

حبايبنا تِركبْ.. والعزولْ يمشى

ويا ربى ماتحكمشى ماتحكمشى

شُورِى عَلَيَّا أهِدِّ ولاّ َابنى

أفضلْ وحيدْ ولاّ أجيب ابنى

مستنِّى نايبى فيكى ما نابنى

غير الصداع.. ونصيبى ما صابنى

شُورِى عَلَيَّا استنَّى ولاَّ امشى

ويا ربى ماتحكمشى ماتحكمشى

عايزِكْ تعودى شمْسَة فِى سَماكى

وتشدِّى عودى المحنى فِى هواكى

وتفكرينى قبل ما انساكى

مهما يدوم البُوم فى شِبَّاكى

الله اللى دايمْ غيرُه مادايمشى

ويا الله ماتحكمشى ماتحكمشى

وارِثْ غيطان وارثْ سَما ومتاريس

وارِثْ مرارة محنتِك يا إيزيس

وارِثْ فؤادَة وجرحَها وعتريس

وارِثْ ما بين مليون وريث ووريث

اوْرِث معانا.. ليه ما تورثشى

وماتحكمشى ماتحكمشى ماتحكمشى