وقالت رشا: "أول ما شفتها بهرتني .. ولما سألت عنها وعرفت دي مين وبتعمل إيه .. تحولت لطفلة معجبة..حقيقي وحصل .. أنا اتصورت مع الزبالة .. وعاوزين الحقيقة كمان .. أنا طلبت من حد معرفوش يصورني (صورتين) .. مشهد ميختلفش كتير عن أي مشهد بتشوفو لأي معجب بيقابل شخصية بيحبها وبيطلب إنه يتصور معاها للذكرى".
وأضافت "كنت باتمشى في برلين ومعجبة جدا بنضافة البلد .. وعمالة أفكر إزاي البلد كلها نضيفة كده .. وطبعا بكل عجرفة مدعى الثقاقة حملت المجتمع المسؤولية (اللي هوا إحنا) وفضلت أقول لنفسي نفس الكلام اللي كلنا بنقوله.. الوعي والمجتمع والتعليم وإن الحل لازم ييجي مننا الأول قبل الحكومة".
وتابعت: "أول ما دخلت سوبر ماركت لقيت غسالة كبيرة شغالة والناس واقفة جنبها .. لفت انتباهي ان الغسالة دي بتطلع فلوس! .. والناس اللي واقفة معاها أكياس زبالة .. طبعا الفضول قتلني وسألت الموظف فقاللي ان دي زبالة حضرتك! .. الحكومة عاملاها تشجيع للناس عشان النضافة .. اللي يحط فيها زبالة يطلعله فلوس وليها تسعيرة مكتوبة عليها".
واختتمت قائلة "بس يا جماعة .. ووقفت في الطابور لحد ما وصلت وخدت صورة .. عشان أفكر نفسي دايمًا إن الحكومة الجد في معالجة النضافة بتلاقي حلول..المشكلة مش فينا كمجتمع .. المشكلة في الزبالة اللي مش لاقية حلول".
