■ هو الإنسان إيه غير شوية قرارات حاسمة لفض اعتصام جاب للبلد القوق..
■ البرادعى؟؟؟؟؟؟؟؟.. الدكتور محمد البرادعى؟؟؟؟؟؟؟؟؟؟؟؟.. لسه فيه إيه تانى يا خيبة الأمل حاتلطخينا بيه؟؟؟؟؟؟؟؟؟.. بس ماشى.. شغال يعنى.. مش ده اللى حايعطلنا.. فى الظروف المشابهة.. لو واحد عطل وتعمد يقف أو يقعد فى الأرض عشان يعطل المسيرة.. ماتتكعبلش فيه.. حطه على جنب وكمّل.. لما يخلص المشوار وينفضّ نبقى نرجع نلم المكسور..
■ من الأشياء التى تجعلنى أتنطط وأتشقلب م الغيظ، عندما يجلس أحدهم لينظّر فى اللى خلفونا ويهز رأسه كأنه وصل لسر شويبس «على فكرة دول مش ممكن يكونوا مسلمين.. الإسلام ماقالش كده.. إنهم لا يمثلون الإسلام».. يا راجل؟؟.. توك ما اكتشفت؟؟.. بتعوّق معاك المسائل شوية؟؟.. ده كل اللى فهمته من المسلسل التركى اللى اتكتب علينا نعيش أحداثه كل هذه المدة؟؟.. خلاص.. فضكوا م المعنى ده ولا ترددوه مرة أخرى.. بلاش سذاجة بقى.. إسلام إيه واللا أى دين إيه اللى مليان قتل ودبح وكذب وتدليس وتآمر ونكاح جهاد ومتاجرة بعيال وتمثيل رخيص وكل المصايب اللى برع هؤلاء القتلة فى إبرازها وإعلانها؟؟.. العيب فيكم إنكم صدقتم أصلا..
■ قناة الجزيرة.. من شابه رفيقته التى هى الجماعة ما ظلم.. معتصمة فى بلدنا بقالها سنين.. بتبرطع زى الحمارة المتطلقة.. عايزالها فض هى كمان.. وفى ظل قانون الطوارئ أظن من حقنا نطربقها عاللى فيها.. ونأتى لموضوع اللى فيها دول.. وأقصد المصريين العاملين بها.. لينا كلام كبير وحساب عسير معاهم.. فهم من وجهة نظرى لا يقلون خيانة ولا عمالة عن اللى مجندهم.. صبيان عوالم لا أكثر.. وعندما تجد قناة حقيرة مثل الجزيرة هذه الشلة من بياعين الوطن يبقى العيب مش عليها.. العيب عاللى باع وخان وتاجر وقبض.. والعيب عاللى سابه يعمل كده..
■ فض بفض بقى.. كان الأجدر بأولى الأمر أن يستمعوا لكلام النائب السابق علاء عبدالمنعم إثر عزل مرسى مباشرة، عندما نصح وشدد فى النصح بأن يتم القبض فورا على باقى العصابة.. واستخدم تعبير «شيل الفيشة».. خصوصا أن لديهم جميعا ملفات سميكة من الجرائم المثبتة صوت وصورة.. وقال وقتها إنهم كلهم على بعض كده لا يتعدوا المائة وخمسين شخصا.. فإذا تم هذا تصبح كأنك قطعت عرق وسيحت دم.. ولكن التردد والتخاذل وعمل حساب لكلام وتلقيح النوشتاء هو الذى أدى لتفاقم الوضع.. لأن هؤلاء المائة وخمسين شخصا هم بعينهم الذين قادوا الاعتصامات وارتكبوا من الجرائم ما ارتكبوا.. سواء كانوا مستخبيين ورا الحريم فى الجامع فى رابعة.. أو مطلوقين على تويتر والوسائط يستعدون الغرب ويستنجدون به ملوّحين بالاتفاقيات السرية المبرمة.. ولو مسكونى حاجيب رجلك والحواديت دى..
■ فى هذه الأمور الخطيرة والخارجة عن أى إطار مألوف أو شرعى، ومن وجهة نظر شخصية بحتة، يتحتم تطبيق الديكتاتورية.. مفيش هزار فى مثل هذه الأمور.. بلا مصالحة بلا لا للإقصاء بلا هبل.. هذه مصلحة وطن ثبت بالدليل القاطع الباتر الحاسم أنهم كانوا يهدرونها ويمسحون بها البلاط.. الواحد قعد يفر فى اعتصامات حصلت فى أكثر البلاد تقدما لا لقى ديمقراطية من اللى بيتشدقوا بيها ويتمنظروا علينا ولا نيلة.. من أول أمريكا لحد تركيا.. ومش كله بالقانون.. وإلا.. جوانتانامو لسه فاتح ليه؟؟.. والسؤال الذى لا يطرحه النوشتاء.. لو اتعكس الوضع.. والناس دى اتمكنت فعلا.. كانوا حايتصرفوا إزاى؟؟.. كنتوا حاتعرفوا تحدلوا وتبدلوا معاهم؟؟.. والا هى فنجرة بق من خلف شاشة كمبيوتر وخلاص؟؟..
■ من أمراض العصر الحديثة.. مرض التتويت الذى يصيب بعض الأشخاص الباحثين عن منصب تتويتى مدام مش لاقى حاجة يعملها فى الحياة.. بعيد عنكم حاجة كده زى القرادة تعفق ف قفا المواطن المريض من دول ماتسيبهوش إلا وهو مصاب بحالة سيولة جسدية وعمال يلظ زى الجيلى.. ممكن يكون بنى آدم ذو شوية حيثية بس ناقصة شهرة.. أو يكون عامل فيها متوت جامد ولو دورت عليه تلاقيه سارق كومبيوتر العيال ومستخبى ورا كنبة الصالون عشان يبقى قريب م الفيشة.. بس الأكادة هراى درجة أولى.. تدخل تتمشى فى تويتر فتجد نفسك فى حمام مقطوعة ميته.. يحصل الحدث من دول والهرى يشتغل على ودنه.. فى أى اتجاه وكل اتجاه.. كل ساعة مع توجه شكل وبرأى غير بتاع إمبارح خالص.. المهم إنه يتوّت.. يقول أنا موجود.. ومش أى موجود.. لازم يلوى بوزه ويقول مش عاجبه.. ويسقط يسقط أى حد معدى جنب التويتة.. وربما جنب الكنبة..
■ السادة المسؤولون.. عندما صرحتم بكلمة «فوجئتم» بالفوضى التى أحدثها المجرمون فى البلد لم تكن فى مكانها.. لا «تفاجأوا» تانى.. وأدينا بنقولكم من واقع تهديدات العصابة الحقيرة.. باقى المخطط الإجرامى هو شوية انفجارات وحرايق وضرب فى كل معالم الحضارة الحديثة زى المكتبات والمتاحف، وطبعا الكنائس.. تتوقف شدة هذه التخريبات على ردود الأفعال الأمنية والشعبية أيضا.. ثم هدوء خادع واختفاء من الصورة.. ثم بدء الاغتيالات الفردية.. عشان كده نكرر.. سارعوا بشد الفيشة.
■ أجمل حظر تجوال رأيته فى حياتى ذلك الذى بدأ مساء الأربعاء.. رغم أنه فى مجمله يساوى خراب بيوت لناس كتير.. لكن منهم لله اللى كانوا السبب.. يقعدلهم فى صحتهم وعافيتهم يارب.. وجمال الحظر لم يكن بسبب خلو الشوارع من المارة بشكل حاد وقاطع وروقان البلد واختفاء الزرائب التى أنشأها البعدا فى أرقى شوارع العاصمة.. ولكن لامتثال الناس كلهم بلا استثناء واحد يُذكر.. طاعة لمن تحب، وثقة فيمن وليت، واستجابة لأمر تصدق أنه لصالحك.. وبما أن الشىء بالشىء يُذكر.. افتكرت حظر التجوال اللى قال إيه فرضه علينا اسم النبى حارسه وصاينه سى مرسى.. يا نهار أزرق.. يومها الشعب كله نزل للشارع عشان يتفرج عالحظر.. واتعمل عليه حفلة وأقيمت مباريات كرة القدم فى كل الميادين من بعد صلاة الفجر.. فيه كده تهزىء فى الدنيا؟؟..
■ قطر.. بره.. سفارة قطر.. بره.. سفير قطر.. بره..
