ايجى ميديا

أول امبارح كان فيه مصيبتين، وفى نفس التوقيت، الأولى وهى الأهم مباراة منتخبنا فى كأس العالم للشباب أمام العراق، والثانية هى خطاب السيد الرئيس الدكتور محمد مرسى، وللأسف خرجنا من الاتنين بصفر من النقاط، خرجنا بشكل مؤسف بأداء سيئ جدًّا إذا كان للرئيس مرسى، بس للأسف هو هدّ سنة كاملة وموارد دولة كاملة وفى الآخر مافيش أى حاجة وكل حاجة، ماعادش عندنا حاجة خالص، لا بنزين ولا سولار ولا مية ولا كهربا، الحمد لله نشفت خالص، وبعدين طالعين نتكلم عن الإنجازات زى كده ما الكابتن ربيع يرجع من بره من تركيا ويقنعنا إنه حقق لقب كأس العالم واحنا مش واخدين بالنا، لما ييجى يقنعنا إنه أدّى أداء عالى جدا وكان باهر جدا العالم كله، لما ييجى ربيع ياسين ويعمل كشف حساب له فى الفترة التى تولى فيها قيادة البلد، قصدى المنتخب، ممكن والله فعلا هتلاقيه مليان إنجازات، صعد لأمم إفريقيا وحقق اللقب الغالى فى ملاعب صعبة وتحت ضغط قوى من إعلام ومن جماهير متعصبة للمنتخبات الأخرى، ومع ذلك شال اللقب ورجع لمصر غانم مع الأفراح والليالى الملاح ومن بعدها ماشُفانش النور، اللعيبة فرطت مننا، نصهم قعد يفرح إنه وزير وركب الكرسى، آسف قصدى اللعيبة، معلش أنا كل ما ادخل فى الكورة ألاقى نفسى مشدود للسياسة، معلش نرجع لعم ربيع والباقى من اللعيبة، شوية كانوا فى فترة معايشة فى الخارج علشان يلاقى نفسه خارج البلد ويلعب فى جو نضيف والباقى من اللعيبة كانو غير أساسين فى الفريق، صحيح حاول الجهاز الفنى وأخدهم فى فترة كبيرة بره، بس للأسف اعتقد إنها فشلت كثيرا وأصابت اللاعبين بحالة من الملل الفظيع، وهذا متعارف عليه فى كرة القدم، زى ما أصابنا الملل نحن، بس احنا بقالنا سنة فى المصايب والكوارث الطبيعية وغير الطبيعية التى أصباتنا فى مقتل من كل وزير تولى البلد فى الفترة السابقة ومن الكدابين بتوع البلد بعد ما قربت على الضياع، وفى الآخر ييجى الدكتور مرسى ويقنعنا بالإنجازات خلال السنة. والله ما عارف مين أنجز، ربيع ولّا مرسى! أهو الاتنين خرجوا، بس لسه فيه واحد عنده فرصة، تتوقعوا مين فيهم، مرسى ولّا ربيع؟