يا مصرى إنزل للميادين
قول كلمتك فى يوم تلاتين
بيهدِّدوك تجار الدين
وهما منك مرعوبين
اللى بِيِهتف وا مرساه
مفتاح جهنم مش وياه
والجنة بابها بأمر الله
مفتوح لأحلام الملايين
تلاتين دا حيوافق يوم حَدّ
فيه حد فاصل للأجيال
فيه شعب واقف زى السَّدّ
اللى بناه فى عهد جمال
يا مصرى قوم النيل حيضيع
سينا حترجع محتلة
حيبيعنا جاهل فشله ذريع
شخشيخة لحرامى الحلة
بلدنا غرقت فى زبالة
لقمتنا مغموسة مجارى
بشطارته فاكرها بقالة
بيَّاع بيضحك على شارى
انزل وسيبك من تهويش
ضباع عجوزة وذئب سخيف
الناس دى مش ممكن حتعيش
مع شعب حر ودمه خفيف
حُطُّوا ف عينيهم ملح رشيد
وكحل على شطة سودانى
الشعب عايز حكم جديد
من غير مبارك إخوانى
ماتخافش من واحد كدَّاب
لحّاس وعود نجَّار تمكين
فضح بلادنا ف إثيوبيا
بجهل أصلى ومخ تخين
زميله عايش فى السرداب
إرهابى متمسّح بالدين
من عصر أقلام الكوبيا
بيبيع فتاوى للسلاطين
يا مصرى إنزل للميادين
هما اللى منك مرعوبين
حِصن الأمان حضن الملايين
قُصر الكلام بقى يا سامعين..
مافيش شعوب مغلوبة على أمرها
ولا فيش بشر مغصوبة على قهرها
القبح أظلم والنهار أجمل
صحوا اللى نايمين ينزلوا الميادين
الجهل ماضى وكلنا ناويين..
نطلع بإذن الله على المستقبل
