رئيس الجمهورية الدكتور محمد مرسى عود أخضر، وفلاح أصيل، واختيار ربانى، قشطة يابا، قشطة يا عمى، قشطة يا فنان، نقيب الموسيقيين مصطفى كامل بيرقّص مرسى على واحدة ونص، ناقص يقول للرئيس: زى ما خدت البلد يا ريس، أنا خدت النقابة، وزى ما ربنا اختارك، ربنا اختارنى، ربنا اختارك مش الإخوان، وربنا اختارنى مش الألاتية، وزى ما هزمت شفيق، هزمت إيمان البحر درويش!!
أول الرقص حنجلة، ورقصنى يا جدع، نقيب الموسيقيين الجديد فاكر الرئيس مرسى عنده فرح، نازل ينقط، معلوم نقطة المؤلف أغنية، ونقطة الموسيقار طقطوقة، ونقطة المغنى موال، ونقطة الممثل مشهد صامت (ضيف شرف)، ولأن النقيب مؤلف وموسيقار ومغن وممثل فى آن، يعنى أربعة فى نقيب واحد، النقطة صارت مربعة، مصطفى كامل الشهير بـ«أمير العذاب» قدم نمرة رئاسية افتتاحية، نقوطك يا مرسى.
سلام مربع يا جدع للرئيس الجدع، الرئيس الحلو باللسان مش بس بـإيـده ودراعــه، الرئيس الحلو يا جدعان ما ياخدش اللى مش بتاعه، وأنا ممكن أبيع جتتى كله إلا رئيس حتتى، واللى يعلى صوته على مرسى يبقى ناوى على موته، يبقى ناوى على إيـــه.. وخدها كلمة منى زى ما قال شعبان عبدالرحيم، بحب محمد مرسى وبـكره حمدين.
أمريكا بعتالنا دولارات بتقولك على الطاسة (من التعلية)، عايزانا نديها مخـــدرات ونركز فى الرقاصة، الدكتور مرسى ضحك على الأمريكان وركز فى العلوم، واشتغل فى ناسا كام ميت يوم، وقشطة، قشطة يابا، الراجل الحلو بعلمه واجتهاده، ووكالة ناسا تشهد على اختراعاته، ورقصنى يا جدع على السلام الوطنى، وكله قيام، من ورا لقدام.
قشطة يابا، قشطة يا عمى بديع، أنا ممكن أبيع جتتى كله إلا إخوان حتتى، واللى يعلى صوته على مرسى يبقى ناوى على موته، والرئيس الحلو مرشده حلو، وكله «إلا أيامك» يا بديع، وسلام للباشا الكبير، الباشمهندس خيرت الشاطر، ورقصنى على أغنية «الشيطان شاطر»، وبقولك يا هندسة، دقـت الـسـاعـات يـا دنــيا واتـقـفـل بـاب الـعـتـاب، إنـتى صـح أكـيـد يـا دنـيـا.. أنـا الـلى غـلـطـان فـى الـحـساب، كـتـرى الأحـزان شويـة.. سطـرى واملى الـكـتـاب، هـــــو ده الـلـى مـكـتـوب عـلـيـا اتـولـد أمير الـعـذاب.
وسلام على طول السلام للوزير باسم عودة، ولو كنا حبــايب وإخـوات أكلنى الخبز «الحلو» فى «بُقّىِ»، والسلام على طول السلام لكل أعضاء مكتب الإرشاد والمكاتب الإدارية، وكل الأخوة فى المناطق والشُّعب والكتائب، وأنا نفسى نلم التيتة بلا شلة بلا برتيتة، اللى عاملى صايع واللى عاملى ضايع، اللى عاملى صايع يهدا، واللى عاملى ضايع يهدا، واللى عاملى تجرد يهدا، واللى عامل تمرد يهدا، واللى اتمردوا على الرئيس اتمردوا على إيه، واللى اتمردوا عليه خدوا إيه، يا شاب إنت وهو بلاش تتمرد، واحمد ربنا ع العيشة، مضايق من مرسى شد الفيشة، لو إنت كده فى الأوضة يبقى ليلتك إيـــــــــه؟ تبقى ليلتك سودة.
فاصل من الرقص السياسى الفاضح على واحدة ونص، قدمه أمير العذاب، فنان الليل وآخره، نجم الألبومات الرايقة، بطل فيلم المئوية السينمائية «قشطة يابا»، نجم النجوم، صانع النجوم، من كاريكا إلى صاصا، كنت فى القلب شايلك ياصفصف، ليل ونهار بحايلك، مش فاضل ولا برج سليم فى عقلى يا مصطفى من عمايلك.
من أغنية (الأهلى والزمالك للموسيقار مصطفى كامل بتصرف).
