قال المخرج عمرو سلامة عبر صفحته الخاصة بموقع التواصل الاجتماعي "فيس بوك" عبارات سياسية بدائها " لو حضرتك مقتنع إن عصر الملك أيام ما كان المصريين محرومين من دخول مطاعم بل شوارع معينة ، أحسن من عصر عبد الناصر.
ومقتنع إن عصر عبد الناصر اللي كان فيه أي ضابط جيش يقدر يسجنك لو ماعجبهوش شكلك ، لحد ما من غرورهم دخلوا معارك خسروها كلها وضيعوا ثروات مصر أحسن من عصر السادات.
وكمان مقتنع إن عصر السادات اللي بقى دكتور الجامعة فيه مش لاقي ياكل وتاجر الشنطة بقى مليونير، أحسن من عصر مبارك.
وعصر مبارك اللي مجاري الفساد طفحت فيه لحد ما غرقنا وضابط الشرطة إفتكر نفسه فيه إله ، أحسن من ما بعد الثورة وحكم المجلس العسكري.
ومقتنع إن المجلس العسكري اللي قتل وسحل الثوار والمسيحيين في ماسبيرو وأدار مصر كأنه يدير وحده أو كتيبة أكثر تحررا من الإخوان .
سعادتك بعقليتك اللي قفاك فيها مكان وشك وقاعد بتبكي على أطلال كل ماضي، إنت نفسك اللي في المستقبل هاتترحم على أيام مرسي، حتى لو كنت قاعد تعارضه بصوتك الجهوري " .
وأنهي سلامة كلامه قائلا : اللي يبص وراه عمره ما هايعرف يتحرك لقدام، ولو إتحرك مسيره يتكفي على وشه ، مش عايزين نبقى مشلولين وقاعدين نختار بين إختيارات الماضي، عايزين نتمرد علي الحاضر ، بس حلنا الوحيد اللي مالوش ثاني إننا نبص لقدام، نتخيل أفضل حل برا الصندوق ونحارب علشان نحققه " .
ولحد ما يخترعوا " آلة الزمن الماضي لن يعود " ، ومحاولة صناعته خيابة وبلادة فالبلدعمرها ما هتتعدل الا لو كل واحد بص قدامه .
