قليل البخت فى ليلة واحدة يشاهد حوار للرئيس فى «الجزيرة»، ويقرأ للريس تغريدة على «تويتر»، خبطتان فى الراس توجع، قال الدكتور مرسى لا فض فوه، «نسعى لاستثمار حقيقى فى مصر، والقروض كالدواء للجسد لا يُبنى عليها الجسد أو يعيش»!!
**
الريس ده هيجننى.. هيجننى
طير مفاتيح عقلى منى.. هيجننى
ييجى وفد الصندوق.. وخناقه يزيد.. عايز قرض دولى بالتقسيط
القرض 3 أشكال.. والفائدة بدولار وريال
ويوماتى قروض، وودائع، وصكوك، وسندات.. وحزمة قرارات
غير الإجراءات.. والمشاورات.. والحوارات.. والمباحثات
وإن قلت يا ريس القرض خطير.. القرض كتير
وبلاش استدانة وبلاش تبرير.. وبلاش تبرير
يصرخ ويقول:
يا خواتى فلسان ورئيس شقيان
والمعارضة عايزة تسقطنى فى الانتخابات
دى مصيبة إيه دى؟
يا عالم فهموه الحكم ماعمروش كان كده..
الحكم لازم تفهموه.. والحكم مش بالشكل ده
**
الريس ده هيجننى.. هيجننى
طير مفاتيح عقلى منى.. هيجننى
ييجى من روسيا وحريقة تطير
ويخش القصر ويغرد ويقوم زعابيب قمشير
عاملينلنا مليونية إخوانية.. وتطهير القضاء.. بس!!!
وجمعية خيرية.. ولجنة قانونية.. وكتاب إنجازات وهمية.. بس!!!
طب فين الضرائب التصاعدية.. والإجراءات التقشفية.. وحركة المحافظين؟؟
والوزارة الجديدة اللى أنا جايبها راحت فين.. فين هى؟؟
وإن قلت يا ريس الوضع الداخلى خطير.. الوضع خطير
وبلاش قرارات رئاسية وبلاش تهديد.. وبلاش تهديد
يصرخ ويقول:
يا خواتى فلسان ورئيس شقيان
والمعارضة مش عايزة تريحنى ونعمل حوار
دى مصيبة إيه دى؟
يا عالم فهموه الحوار ماعمروش كان كده
الحوار لازم تفهموه، والحوار مش بالشكل ده
**
الريس ده هيجننى.. هيجننى
طير مفاتيح عقلى منى.. هيجننى
وعايز يرص المعارضة على الطاولة أحزاب وجبهات
ويخطب فيهم ويصلى ويسلم ويقول حكايات
يسيب الأزمة برمتها، ويمسك فى الهمهمات
وجولة تجر جولة.. ييأس من الحوار ويقوم على طول
والحوار بحاله ما يساوى.. والحال فى البلد تانى يوم هو الحال
وإن قلت يا ريس الوضع الداخلى خطير.. الوضع خطير
وبلاش تعنت وبلاش تكبير دماغ.. بلاش تكبير
يصرخ ويقول:
يا خواتى فلسان ورئيس شقيان
والمعارضة مش عايزة تريحنى ونعمل حوار
دى مصيبة إيه دى؟
يا عالم فهموه.. الحوار ماعمروش كان كده
الحوار لازم تفهموه.. والحوار مش بالشكل ده
الريس ده هيجننى.. هيجننى
طير مفاتيح عقلى منى.. هيجننى
(بتصرف.. الراجل ده هيجننى - صباح وفؤاد المهندس)
