اخرس.. أدب سيس.. ضابط خرسيس.. أدب يوك.. تربية يوك.. إنت يا خنزؤور تتطاول على ابن دولة الرئيس؟!!، والله والنملة طلع لها سنان يا ولاد، الواد عبدالله ابن الريس مرسى نازل تلطيش فى ولاد الناس، ناقص يقول لملازم شرطة «أحمد حمدى» المكلف بحماية منزل العائلة الكريمة، قوم اقف وانت بتكلمنى، إنت مش عارف أنا مين، وابن مين فى مصر، أنا ابن الرئيس، والله لأقلّعك البدلة الميرى، وتروح تقعد فى البيت جنب نينة.
عارفينك يا سى عبدالله، ابن الرئيس مرسى لا كذب، حصل لنا الرعب والتهديد، افتكرتك البرنس «علاء» بتاع «رد قلبى»، والضابط «على يا ويكا» ابن عبدالواحد الجناينى فى عزبة العياط- شرقية اعترض سيارة جنابك الـBMW، غالية قوى يا سى عبدالله، من مصروفك صح، يا سلام يا ولاد، ابن الرئيس بعد الضنى لابس حرير فى حرير وراكب سيارة بتطير.
خلصنا من مبارك وولديه، يطلع لنا فى البخت مرسى وولاده، كل يوم بحكاية ومسك سيرة، وآخرة المتمة، ابن الرئيس هيقلع الضابط بدلته الميرى، يعنى يرفته، فاكره ضابط خنزؤور هيخاف من ابن الرئيس، احمد ربنا يا عبدالله، جت سليمة، ولم يقلعك ملابسك فى عرض الطريق، ضابط مؤدب، لا مؤاخذة يا باشا، العتب على النظر، مش كنت تزمر!!
سعادة اللواء محمد إبراهيم، صباح الخييييير، سيادتك وزير الداخلية لست ناظر العزبة فى الشرقية، ابن الرئيس أهان رجلاً من رجالك أثناء تأدية عمله، أهانك، والوزارة، والبدلة الميرى، ابن الرئيس شايف نفسه على الداخلية، مرة يهين أمين، وهيقلع ضابط الميرى، قول لوالده عيب، يضربه قلمين على صداغه، وبدل ما تجبروا الضابط على الصلح، والصلح خير، خد حقه أولاً من ابن الأكرمين، اللى مالوش ضهر.. الداخلية ضهره يا سى اللواء محمد.
تخيل يا ريس مرسى، الضابط لو اتحمق ورد إهانة ابن الرئيس بمثلها، والجهل بابن الرئيس منجى، إيش عرف الملازم إن سعادة البيه ابن الرئيس؟، على الخد شامة ولا على الكتف علامة، ابن الرئيس لابد أن ينأى بنفسه- وبوالده الرئيس- عن الصغائر، ما ظهر منها وما بطن، يحترم مقامه، لأنه من مقام الرئيس، ولا يعرض نفسه والرئيس لما لا يحبه الرئيس ولا يرضاه لمصرى بسيط انتخبه رئيساً.
وأحب أقول لأسامة (أخوه الكبير) ابن الرئيس لا تخوله بنوّته للرئيس أن يعنف ضابط شرطة لا أن يهدده، ولا أن يقف فى عرض الطريق صائحاً «أنا ابن الرئيس»، فيخرّ الناس ركعاً وسجداً، حاشا لله، ولاد الرؤساء ميعملوش كده، ابن الرئيس «نموذج ومثال»، يقينا هناك من يتصيد الأخطاء لأولاد الرئيس، لكن ولاد الرئيس لازم يبتعدوا عن كمائن الداخلية، هل مطلوب من ضباط الداخلية يقفوا زنهار، ويهتفوا مع وصول الـBMW، وصل وصل وصل، ابن الرئيس وصل، ويعزفوا سلام ابن الرئيس، أهو جه يا ولاد، هيصوا يا ولاد، أهو جه يا ولاد، زقططوا يا ولاد...!
