النَّفَس الطالع مِن جُوفَك آية وإعجاز
بيبَرَّد كُبَّايِةْ شَايَكْ
وفْ نفس اللحظة بكام نفخة بيدَفِّى إيديك
يطْلَع تنهيدة عشان صَبْرك على ناس حواليك
ينفُخ بالونة ويرفعْها
ينفُخ فى ستارة يوقَّعْها
يطلَع دُخَّان أو عَصَبية
يطلَع صُفَّارة لأغنيَّة
أو يطلع فَرحَة على الإنجاز
وما بين شقّ النَفَس الأول
والنَفَس المستَنِّى شوية
فيه عُمْر بيجرى ولا الألغاز
بيحدِّد مِين ضيَّع نَفْسُه على وهم مالوش معنى
ومِين فاز
