■ السادة الحُكام الكتير قوى اللى عندنا دول.. انتوا بتشتغلوا بعض يا جماعة؟؟.. بتقعدوا تقولوا لبعض كلام فطش جامد قوى.. وبتصدقوا نفسكوا وفاهمين إن الناس اللى متضايقة منكم وطالع بهاليل أبوها من حكمكم قلة مندسة.. وانهم هما الشوية الصغيرين من وجهة نظركم اللى بينزلوا الميادين بالقياس لتعداد الشعب.. وبتطمنوا أنفسكم بحزب الكنبة اللى قاعد ومبطوط وما بياخدش أكشن واضح فى الشارع.. إنتوا غلطانين جدا.. مش قلة مندسة ولا كنبة.. نو.. ابسيلوتلى.. إوعوا تنسوا ان مصر فيها ما لا يقل عن عشرين تلاتين مليون نسمة ساكنين العشوائيات والمقابر والذى منه.. سيبكم من المثقفين والنخبة اللى دايسين على عصب ضرسكوا وبيلعبوا البخت فى بوبو عينكوا دول.. وبيحاولوا يقودوا المعركة بشكل حضارى أصبح مرفوض من الشارع.. ولا توهموا أنفسكم انكم نجحتم فى إفشالهم.. فرغم أن الشارع أصبح يحتج على دبلوماسيتهم ومبادراتهم ومؤتمراتهم السلمية.. ويراهم متراخين فى تحقيق ما يرنو إليه الآن وحالًا.. وهو تغيير السلطة الحاكمة التى اتضح فشلها الذريع وخيبتها التقيلة لكل مواطن مهما كان مستواه الاجتماعى وثقافته.. إلا أنهم يدركون فى قرارة أنفسهم أن وجود المعارضة هو صمام أمان.. حتى لو تقاعست مرحليا عن تحقيق رغبتهم الحالية.. لأنها لو تركت الميدان تماما.. فسوف تتركهم فى مواجهتكم وحدهم.. وساعتها سيحدث ما لا تحمد عقباه لهم ولكم.. حايبقى منكم ليهم طس..
■ سكان العشوائيات والمقابر اللى هما مش ناس جاهلة ولا بالضرورة فقيرة.. بل لديهم وعى خاص بهم يفوق وعيكم بمراحل.. لكنهم ناس اضطُهدوا على مدار تلاتين سنة من مبارك بدون سبب.. وهى دى جريمته الأولى والأكثر فحشاً من كل جرائم الفساد.. دول وجدوا نفسهم مضطرين لخلق مجتمع لنفسهم عافية كده لما ما لاقوش مكان فى المجتمع المستقر حواليهم.. ودول مش طايقينكم.. حايطلعوا طلعة واحدة.. مش على المجتمع اللى حاولوا يتعايشوا معاه وقبلوه وقبلهم حيث إن الاتنين لم يكن لهم أى حيلة.. لكن عليكم لأنكم بتزودوا العيشة ضلام والجيب فراغ والأمن ضياع.. هؤلاء الناس ليسوا جياعاً ولا جهلة ولا حيوانات.. دول ناس ظروف الحياة خلقت لديهم فلسفة.. لأنهم رغم الفقر والضنك بيتعلموا من الموت اللى حواليهم واللى بيكوّن معظم الفلسفة لديهم.. فإذا كنتم تعوّلون على أنهم إذا خرجوا فى ثورة جياع سيأكلون الأخضر واليابس اللى هو احنا.. فاعلموا أنكم أنتم معظم الأخضر واليابس.. لأنهم يدركون أن المعارضة لا تملك أى سلطة ولا تشرّع شيئاً ولا تقرر ماذا تفعل بموارد ومقدرات البلد.. المعارضة لا تختصر العيش فى ثلاثة أرغفة.. لا تطلق شيوخا يفتون بالقتل.. ولا تضطهد الأقباط.. ولا تقسم الشعب وتشيع الفتنة الطائفية.. ولا تهدر القضاء وتهينه.. ولا تنتهك النساء وتتحرش بهم.. ولا تطلق عصابات شوارع تحت مسمى النهى عن المنكر.. ولا تستورد قتلة من حماس ولا أفغانستان.. ولا تغتال الشهداء بسبق إصرار وترصد.. ولا تعذب الناس فى الأقسام والسجون.. ولا تسحلهم فى الشوارع والله يعلم ماذا يحدث خلف الحيطان.. أنتم الذين تضعون أيديكم على الشرطة المختفية والجيش المتباعد.. وأنتم الذين تملكون المال والتمويل الخارجى والداخلى.. وأنتم الذين تعقدون الصفقات غير المفهومة مع قطر وإيران وحماس وإسرائيل وأمريكا.. أى أن القوة معكم ولكنها عليهم.. فاصحوا للدور بقى.. البلد بقت خرابة بينعق فيها البوم.
■ يصر بعض المخططين، سكان الغرف المظلمة والسراديب والدهاليز والدخانيق، على تجاهل قدرة الطرف الذى يخططون له.. المشكلة كلها فى أنهم يخططون لجريمة زى التحرش والاغتصاب الجماعى المنظم لنساء مصر داخل مجتمع مسالم بطبعه.. مش واخد ع الجريمة.. عشان كده بيتفاجئ.. وبتتحسب الضربة الأولى للمعتدى.. وبالتالى بيفرح ويزأطط إنه روَّع وخوف وانتهك حرمة المرأة المصرية.. وتوّبها تنزل الشارع.. غلطان يا كوتش.. غلطان قوى.. لأنك مفترض ان نتيجة الضربة الأولى ستسرى للأبد وبكده تكون تخلصت من عنصر المرأة اللى حاتقول يام وتكش وتخاف وتهجع وتستكين.. والنبى نذاكر تاريخ شوية بقى.. ونفتكر مع بعضينا وسائل انتقام المرأة لما ينداس عليها بالصُرم وتتقهر أوفر.. من أول دشدشة ألواح السرير على نافوخ المستر لحد ما يبقى هو وعجينة الطعمية واحد.. مرورا بدلق حلة زيت مغلى عليه وهو مأنتخ فى البانيو قال بياخد حمام رغاوى.. أو خلط كباية الشاى كل يوم بسم فيران أو ليسيد قاتل القمل والصئبان.. لحد تقطيعه وتشوينه فى أكياس بلاستيك وبيعه فى السوق على إنه عفشة عجل صومالى.. فما بالك بقى بالانتقام من جريمة تحرش واغتصاب مدبرة؟؟.. أهى دى مافيهاش بقى قطع غيار ولا أجهزة تعويضية.
■ السادة الإخوة الإخوان والسادة الإخوة السلفيين.. حبوا بعض يا ولاد.. مالكوش إلا بعض.. إنتوا برضه فريقين زائرين على أرض مضيفة محايدة.. ما تشمتوش الشعب كله فيكوا.. ده حتى عيب لما واحد م الإخوان يهدد السلفيين بأنه حايدخلهم السجن.. قوم السلفى يقوله مش حاندخل لوحدينا.. حانجيبلكم احنا سجون منين بقى؟؟.. إحنا بنهدى النفوس يعنى.. آه..
■ منك لله يا شريف يا عامر.. يا مقدم برنامج الحياة اليوم.. كشفت راسى ودعيت عليك تتشتح تشتيحتنا وتتشندل شندلتنا.. قولوا آمين.. مانت السبب.. انت اللى استضفت سعد الصغير يوم ما سحب استمارة الترشح للرئاسة.. وخليته اعترف انه كان بيهزر ورجع فى كلامه.. كنت تسيبه يا شريف.. سيبه يا خويا.. سيبه يا حبيبى.. عاجبك اللى احنا فيه ده؟؟..
■ إحنا آسفين يا جنزورى.. ياللا بجملة.. اشمعنى كل الناس شغالة دلوقتى إحنا آسفين يا مبارك.. إحنا آسفين يا شفشق.. إحنا آسفين يا حمدين.. جت عالجنزورى يعنى؟.. ده هو أحق واحد بالأسف اليومين دول..
■ كانت فرصة ذهبية أن يطرح السيد رئيس الوزراء قضية عدم نظافة الصدر أثناء الإرضاع مما يصيب الأطفال فى الأرياف بالإسهال.. وبالتالى نطرح نحن الطريقة المثالية لتوخى الحذر من هذه الظاهرة المريعة الشينيعة الفزززيعة.. سيدتى.. لتطهير حلمة الثدى قبل إلقامها للطفل الرضيع عليكى القيام بالآتى:
إحضار كسرولة صغيرة مناسبة لحجم الثدى.. أو متوسطة.. أو حلة.. وفيه ناس حجم ثديها يستحمل بستلة.. واملئيها بالماء وضعيها على النار حتى تغلى.. ثم انحنى للأمام وأسقطى الصدر اليمين فيها حتى يتسلق.. ارفعيه وأسقطى الشمال.. ده ان كنتى لسه عايشة.. وبهذا يتم تعقيم الحلمتين حتى لا يصاب الطفل بالإسهال.. علماً بأنه لا يصاب بالإسهال أصلاً قبل أربعة شهور لأن لبن الأم يحتوى على أجسام مضادة للميكروب تمنع نقل أى بكتيريا أو فطريات جلدية للطفل.. ياللا مش مهم.. المهم إننا عرفنا إن رئيس وزراءنا جامد طحن تنين حشد.. وفاقس فولة الفلاحين اللى بيصحوا من النوم يفطروا.. وبعدين الولية تقول للراجل: طيب أنا رايحة الغيط أُغتصب.. عايز حاجة؟؟.. فيقولها: لأ بس خللى بالك ما تجيبيش عيال معاكى من بره.. كفاية اللى عندنا.. أما نخلصهم نبقى نجيب تانى..
