ايجى ميديا

لما تشوف ست جامدة و بمية راجل اعرف انها قابلت فى حياتها قبل كدة اللى ميعرفوش حاجة عن الرجولة و المسئولية عشان كدة هى غالبا قررت تخلق لنفسها الراجل اللى معرفتش تلاقيه "رجل افتراضى" يعنى .
لما تلاقى ست قلبها بقى حجر يبقى اتحطت فى 100 موقف كسروا قلبها فأضطرت بعدها تقسى عشان متتوجعش تانى مهما كانت مبينة لك القوة و الجبروت (القشرة) وراهم ضعف و طيبة بس تحت السيطرة.
غالبا قابلت الست اللى مشوفتش فى عنيها دمعة فى اشد المواقف .. هى على فكرة باتت ليالى كتير دموعها على خدها لحد ما نشفت خلاص ... الدموع خلصت من عنيها فبقت تنزل جوة قلبها .
و طبعا عرفت الست اللى شايلة كل اللى حواليها و دى بقى غالبا مش بتلاقى حد يشيلها واقفة فى وش المدفع لوحدها .. بتخاف من خيبة الأمل .
الست اللى واخدة دور الراجل تقريبا دورت و فشلت انها تلاقى اللى يلعب الدور دة .. لما تلاقى الست دى يا تحسسها انها ست الستات فترجع ست و تعيش دورها الطبيعى الحقيقى (اللى ربنا خلقها ليه) و ترجع انت لدورك و تسلمك زمام الامور و تسوق أنت يا تمشى و تخرج من حياتها بهدوء زى كل اللى قبلك .
فى ناس بتخاف من الست القوية اللى هو غالبا مش فاهمها .. خايف تستقوى عليه مع ان هى اكتر واحدة لما بتحب و تطمن بتبقى من جوة هشة .. ضعيفة مع حد واحد بس و دة بيبقى بالنسبة لها منتهى القوة .
هى ازاى الست الكائن الطيب الضعيف البسكوتة دى بتقدر تستقوى كدة .. يعنى ايه اللى بيخلى الست تاخد قرار الانفصال بعد ما حبت ؟
اه اللى يوصلها انها تبيع و متشتريش تانى ؟سبحان الله بعد ما كانت مشاعرها فياضة و بتدى من غير حدود و فجأة كل دة يتبخر ؟؟ غالبا الست دى بتكون عندها توقعات و احلام و منتظرة رد فعل مين و لما مش بتلاقيه بتتصدم و واحدة واحدة بيبقى عقابها انسحابها .
الراجل لما بيحب و يضمن بقاء اللى بيحبه بيفضل يهمل و يزعل و يقسى بقصد أو بدون و بيفضل معشم نفسه انهم هيكملوا على رصيده الحلو بتاع زمان مش عارف ان كل مرة نامت فيها معيطة خدت من رصيده شوية .
على العكس بقى الست لما بتحب بيبقى عندها كم عطاء مالوش اخر .. بتدى من قلبها اهتمام و حب و تشجيع و جدعنة ممكن كلمة واحدة تعوضها عن اى تعب و تبقى راضية و مقدرة .. الست لما بتحب بتبقى طفلة بس ساعة الجد بتبقى الجيش و كل الستات بتعرف تبقى الاتنين و انت و حظك بقى تعرف تبقى الدلوعة الحلوة الكيوت أرق واحدة فى العالم و تعرف امتى تبقى جيشك الوحيد لما الكل يبيع .
أنا مغرمة بالست القوية .. الست الذكية مغرية فعلا اللى بتعرف تتحكم فى مشاعرهاو بتوقف قلبها عند حده لو السكة سد .. بتتفادى إهدار طاقتها ونفسيتها (غير بمزاجها) .. المبدعة المستفزة اللى لما تحبك تمارس عليك شيطنتها و شعوذتها كل لحظة .زاللى بتتحشر فى كل حاجة لبسك شغلك ..اللى تنط لك زى القرد فى نص الليل تقولك يالا ننزل نتمشى تعالى نجرب ناكل فى المكان دة تعالى نتفرج على الفيلم دة طب نجرب نعمل سوا الاكلة دى .. أنا بحب الست اللى فى اهتمامها ملائكية .. اللى لما تلاقيك تعبان من الشغل و لا من الناس تقولك مين مزعلك و تطبطب عليك .. اللى بتعرف تشحنك كل يوم عشان تقوى على الدنيا و تكمل من غير ما تضعف أو تيأس .. اللى مش هتسمح انك تتهزم لحد ما تقع دور بقى على الست دى لحد ما تلاقيها عشان تقدر تقاوم و تكمل واحدة تعرف تنقل لها كل أحاسيسك قوة و ضعف و فرح و حزن اللى تعرف تطلعك من اى مود و روتين ممل فى حياتك اللى تقدر تقف فى وش اى حد و تقاوم و تبقى قوية فى وش اى مخلوق و مش بتظهر ضعفها و لا رقتها الا ليك .. البنت الضعيفة مش بتثير اعجاب غير الراجل الضعيف اللى دايما يدور على كائن أضعف منه عشان يمارس سلطته عليه .. الناجحة القوبة مش هيعجبها غير الواثق من نفسه الاقوى منها .. الضعيف بيخاف منها .
من استند على امراة تحبه .. لن يسقط و لن يخذل و لن يهزم و لن يكسره شىء.