ايجى ميديا

 
بتكلمنى كل ساعة ؛ عاوزانى 24ساعة معاها دى مبتعرفش تعمل حاجة من غيرى دى كل يومين تقولى عاوزة اشوفك بتحكى لى كل تفاصيلها دى بتاخد رأيى فى اللبس قبل ما تشتريه حتى مشاكل شغلها أنا عارفها .
حضرتك ممكن تقرأ الكلام دة بوجهتين نظر ممكن تبقى فاهم ان دة حب و تقدير لو أنت بتحب ؛ و ممكن تبقى شايفه زن و ملل و انها خنقة بالظبط لما بنتريق على الناس اللى بتحتفل بعيد الحب لحد ما احنا نحب و نبقى مستنيين حتى لو رسالة فى اليوم دة تحسسنا اننا موجودين و بنتحب هتفضل شايف الرومانسية تلزيق و مراهقة لحد ما انت قلبك يدق .
لما يكون شخص بيكسر معاك كل القواعد دة حب مش ضعف لا الغيرة حب و لا السيطرة و حب الامتلاك حب و لا الرغى طول اليوم حب و لا الحب اننا نخرج و نفضل لازقين فى بعض طول الوقت و بس .
الحب البايظ المشوه اللى بيوصل لنا من الافلام و السوشيال ميديا دة مش حب ..الحب اختيار انك تحب شخص بمشاكله و عيوبه اللى انت عارفها دة حب مش عشان هو perfect
لما يهمك مصلحته دة حب .. انك تيجى على نفسك عشانه دة حب وقفتك فى ضهره حب .. انك تساعد و انت تعبان و تحتوى و انت قرفان و تسمع و انت مرهق دة حب .
كل تضحية بتعملها من قلبك عشان بتحب يا هيشوفها قمة التضحية و الحب و العطاء يا هيشوفها حاجة عادى واجب عليك عشان يفضل معاك .
الست مش كائن ممل و عمرها ما كانت كدة الست كائن عطاء لما تحبك تديك عنيها و تبقى عاوزة تدى اكتر من غير حساب .. من غير ورقة و قلم من غير ما تفكر هتاخد منك ايه .
مرة سمعت بنت بتحكى هى ليه سابت خطيبها "اللقطة" اللى مفيهوش غير غلطة وقالت بالحرف :
هو انسان كويس جدا بس دايما سطحى معايا عمره ما اهتم بتفاصيلى الصغيرة عمره ما خد باله انا بحب ايه هو حتى ميعرفش ايه الاكل اللى انا بحبه ! مسمعش الاغنية اللى انا بعتها له مع ان كان هيفرق معايا رأيه فيها جدا .
اخر مرة اتخانقنا كنت مستنياه يجيلى بعد ميعاد شغلى و كنت هتصالح من غير عتاب بس هو قال اسيب الموضوع يهدأ واتأخر عليا كتيرعمره ما شجعنى على حاجة انا بحبها مع انى كنت محتاجة دة جدا حتى الهدايا كانت تقليدية مالهاش معنى مفيهاش حاجة تشبهنى مش معمولة علشانى أنا مش حاجة تفضل معايا على طول و افضل فاكراه لما اشوفها ... ممكن تكون شايف الكلام دة تافه و سطحى بس لما تحب من قلبك هتحس بكل حرف هى قالته .
مش أصالة قالت "بحب أحس بجد انه و انا جنبه دايما مستعد يستغنى بيا عن الدنيا و اللى فيها والارض بحالها يفرشها لى ورد و أد حب كل الناس لبعض يحب فيا أو اكثر شوية "  
مش أوفرر بس الست كائن سهل جدا ترضيه ..التفاصيل فعلا بتفرق زى الملح فى الأكل حاجة صغيرة فى وسط مكونات كتير بس هى اللى بتظبط .. التفاصيل هتفرق بين واحد عارف الموضوع من برة وواحد فاهم كل حاجة بكل تفصيلة كويس ..هتفرق لو انت بتحب و لو انت متعود و عاوز تمشى الدنيا .
لو بتحب أهتم و لو مش عارف تحب امشى من غير ما تاخد اهتمام و طاقة و حب لو مش هتعرف تمسك جامد سيب لو مبتعرفش اقول كلام حلو اسكت .
كل حاجة هتعملها مش هتكرها هى هتكسر اللى جواها ليك مش هتحبطها بس هتحبط مكانك فى قلبها أنت المتضرر مش هى انت قوتها مش الدراع اللى بتتلوى منه عشان يوم ما تغلط يكون لك رصيد فى قلبها تسامحك بيه عشان يوم ما هتمشى مش هترجع خلى لك مكان فى قلبها محدش غيرك يعرف يوصل له .
You Will be Too Much for Some people, Too Loud , Too Soft But you will always be perfect for the people who Love You.