ايجى ميديا

 
أنت عارف ان انت مش مضطر خالص تكون شخص لطيف و مبهر طول الوقت أه و الله .. you don't Have to be Nice all the time يعنى وارد تبقى يوم لطيف و ظريف و بتضحك و بتتنطط و يوم تانى تبقى زعلان و بتفكر و عندك مشاكل شاغلاك طب عارف انك مش جاى الدنيا تبهر اللى حواليك بانك طول الوقت انسان لطيف و ظريف و كيوت ؟ هو جميل انك تبقى طيب و لطيف لان اساسا محدش ناقصك و طبعا لما تصحى كل يوم تقول صباح الخير يا عالم انا انسان طيب دة مش معناه انك هتسمح لحد يستغلك اويأذيك او يستبيح حدودك و مش معناه انك مش من حقك تغضب و تزعل ..... و تبعد على فكرة .
الطيبة غير السذاجة و غير البلاهة و غير اللامبالاة و غير انك تتهاون فى حقك .
فى دراسة فى التحليل النفسى تبدو بديهية شوية بتقول ان فى نوع من الناس بيتصرف مع اللى حواليه طول الوقت على انه شخص لطيف جدا بيرضى كل الناس مش عاوز يزعل حد ممكن يكون بيتكسف يقول (لأ) مبيعرفش يقولها بيخاف يعترض او يغضب أو يثور بيخاف حتى ان دة يبان عليه دايما بيحاول يتجنب الحاجة اللى ممكن تعمل له مشاكل و بيحاول يرضى جميع الاطراف حتى لو على حسابه و ساعات كتير بيقدم احتياجات الاخرين على احتياجاته هو شخصيا مهما كان جواه مشاعر انسانية عادية جدا و احتياجات بشرية لا جدال فيها بيسموه فى علم النفس People pleasure أو مرضى الناس .
قد يكون الشخص اتعود من صغره يبقى كدة انه يفضل دايما الطفل اللطيف الظريف الهادى المسالم الضاحك المبتسم اللى مش بيشتكى و لا بيهش و لا بينش و رغم ان دى حاجة شكلها جميل و شيك و حلو من برة و هيتقال على ابنك متربى و فى حاله بس فى الحقيقة انها غير كدة تماما ان حضرتك لما استسهلت و خليتوا كدة حرفيا "لا بيهش و لا بينش " انه للاسف بيعمل كدة على حساب نفسه و بيكتم جواه لسنين طويلة مشاعر طبيعية جدا مكانش المفروض انها تتكتم هى اصلا من حقه بس وصل له انه مش مسموح له يعبر عنها خالص مشاعر زى الكره و الغضب و الملل و الاشمئزاز و الرفض الطفل دة اتعلم ميعبرش عن المشاعر دى تجنبا للمشاكل اللى مكان تحصل له او تحصل للى حواليه بسبب التعبير عن المشاعر دى الطفل دة اتحمل مسئولية هو اصلا مالوش علاقة بيها و هى ان اللى حواليه يبقوا راضيين و مش مبسوطين و اذا محصلش دة يتحمل هو المسئولية والعقاب .
حبايبى الحلوين على رأى ابلة فضيلة :
من حقك تعبر على اللى جواك زى ما هو .. و انتى من حقك تظهرى اللى جوالكى زى ما انتى حساه من حقك تحب و تكره و من تفرح و تزعل من حقك تزهق أو تمل من حقك توافق و ترفض من حقك ترسم على وشك اللى جوة قلبك مترسمش الضحكة اللطيفة و انت جواك موجوع و متحاولش تفرض على نفسك حاجة فى وقت ما المفروض ترفضها لازم تتعلم تقول لا فى وقت ما المفروض تتقال احترم مشاعرك قبل ما تطلب من الناس تحترمها خليك لطيف بس مش على حسابك انت مش مضطر طول الوقت ترضيهم و تخليهم بيحبوك بالعافية هكلمهم كل يوم وهما مبيردوش عليا هزورهم هجيب لهم هدايا كتير عشان يفتكرونى و يحبونى جبر الخواطر حلو بس أنت فين ؟ عبر عن مشاعرك زى ما هى حلو انك تعمل مجهود عشان تحب و تتحب بس بالعقل خد زى ما بتدى ارجوك متجيش على نفسك انت مش مضطر .
من حقك بكل بساطة و بديهية انك تكون حقيقى و انك تكونى حقيقية .
You don't Have to be so Nice All the time, you have to be what you Feel.