ايجى ميديا

 
"إن السعادة اشعاع داخلى ينفث أريجه من الداخل إلى الخارج و ليس العكس "         عبد الوهاب مطاوع
يعنى إيه سعادة و نلاقيها فين دى ؟
كتير ممنا بيتخيل إن لو الظروف اللى حواليه اتغيرت هيبقى سعيد لو  بس جوزى يقعد معايا شوية و لا اقدر اخرج زى باقى اصحابى و لا اشتغل الشغل دة زى فلان و هكذا ؟
طيب نسأل سؤال مهم : هل النجاح والوصول لانجاز معين هو دة مقياس السعادة ؟ و هل شغفك وسعادتك بالحاجة هيفضل زى قبل ما توصل لها ؟
طيب السؤال بمعنى تانى تعرف حد بمقاييس الناس ناجح و عامل انجاز كبير بس مش سعيد ؟
الفكرة كلها فى انك تبقى عارف ان السعادة دى رزق اولا و ثانيا هى سعى و السعى دة بيبدأ من جوة لبرة بيبدأ من مكان ما انت تقرر و بيوصل لمكان ما انت تبقى راضى ، راضى عن نفسك و عن حياتك و عن اختيارات ربنا ليك مش عايش بكلاكيع عايش مبسوط بكونك أنت مش كونك مسخ لفلان و لا تقليد لعلان اللى انت شايف ان لوحياتك بقت زى حياته هتكون مبسوط لما تبقى حابب نفسك من غير ماسكات و لا وش مش وشك لما تحب نفسك بمميزاتك و عيوبك لما تطلع اللى جوة قلبك مش اللى المفروض تقوله  لما تحقق احلامك انت و معتقداتك انت مش تحقق احلام غيرك لما تسيطر أنت على حياتك و على مشاكلك مش هى اللى تسيطر عليك و لما تعرف تتعامل مع كل المطبات اللى ممكن تقابلك فى طريقك لما تنجح و تكمل و متقفش لما تبطل تعتمد على أى سبب أو حد غيرك عشان تكون مبسوط !
كل ما بتعتمد على حد غيرك عشان توصل للى انت عاوز كل ما جواك بيبقى أضعف مش هبقى سعيد الا لما مراتى تتغير و انا مش هفرح الا لما فلان يهتم بيا و لما اخس و لما يبقى معايا فلوس كتير و الف العالم باختصار كل ما اعتقادك ان حاجة معينة هى اللى هتخليك سعيد كل ما بتتخلى عن قدرتك انك تتبسط من غيرها.
الفلوس و الجواز و الشغل و الأطفال و اللبس الفظيع و البراندات و الموبايل الاخر حاجة و العربية موديل السنة دى و اى حاجة خارجية هى مجرد عدسة مكبرة بتكبر اللى انت حاسس بيه من جوة لو انت اصلا حاسس بحب و سلام من جوة هتتبسط باللى عندك حتى لو قليل و لو انت اصلا مخنوق و مش راضى نفسك الحاجات دى هتفرحك مؤقتا بس كمان شوية هتزود احساسك بالخنقة تخيل مخنوق و انت فى عربية موديل 2018.
أحيانا لما بنحس أننا مخنوقين كانت اول فكرة بتيجى فى بالنا انا هنزل اعمل شوبنج و اشترى حاجات جديدة لو انت من جواك قررت ان دى حاجة هتفرحك هترجع مبسوط حتى لو اشتريت شراب لو أنت مقرر ان انا هنزل و خلاص على اعتبار ان الناس بتعمل كدة و هى زهقانة هترجع تقول لنفسك انا متضايق انا صرفت كل الفلوس اللى معايا ! "كل يرى الاشياء بعين طبعه".
مش معنى كلامى انك تتخلى عن طموحك و تقف ادام المرايا كل يوم تقول لنفسك انا سعيد لحد ما تتجنن انا قصدى تبقى فاهم ان الظروف اللى حواليك بكل تفاصيلها مش هتسعدك الا لو انت من جواك سعيد و الانسان السعيد غالبا هو اللى فاهم نفسه صح هو اللى عارف هو عاوز ايه فاهم احتياجاته و بيحب نفسه و بيثق فيها فاهم مشاعره و افكاره عشان لما يقابل مشكلة ميخسرش نفسه محتاح يهتم بنفسه اكتر عشان لما حد يتشغل عنه شوية حياته متقفش محتاج يتخلص من المثالية و يسمح لنفسه انها تغلط عشان تستمتع بتجارب جديد بتاخدها كل يوم محتاج تتخلص من القلق عشان تخاطر شوية و تكتب و تتعلم محتاج تبقى عارف انك شخص جميل عشان الناس تشوفك كدة .
حب الحاجة اللى ربنا اداها لك مهما كانت شايفها قليلة عشان غيرك بيتمناها واوعى تفكر فى ان لو كان عندك اللى عند فلان هتبقى سعيد أنت متعرفش ربنا خد منه ايه مقابل الحاجة اللى انت شايفها مصدر سعادة عشان غيرك شايف ان اللى بقى عندك لو جاله هيكون سعيد هما 24 قيراط و متقسمين صح اللى سعادته فى صحته و اللى فى اولاده و اللى فى شغله و اللى فى أم و أب كلنا واخدينهم كاملين اعرف انت بتحب ايه و هيسعدك بمقاييسك أنت مش برأى الناس متاكلش حاجة مبتحبهاش و متكملش مع ناس مش سعيد وسطهم ومتقعدش فى مكان حاسس فيه بالغربة .. ارضى بالمقسوم لك عشان تعرف تبقى سعيد .
السعادة هى انك تعيش كل يوم بأمل جديد و عمل جديد أن تعيش كل يوم دون ان تنظر للخلف ..السعادة فى الرضا .. السعادة فى الصبر .