ايجى ميديا

أهالينا علمونا ان الكورة حياة .. أكسجين الفرحة انك تشجع كورة انك تحب نادى و تشجعه بس مش بالضرورة تكره الفريق الثانى .
أفرح بفوز الأهلى بس مش لازم تشمت لما الزمالك يتغلب و العكس شىء مهين جدا لما يبقى مصدر سعادتك و قوتك فى خسارتك الأخرين مش تفوقك أنت !!!
لما كانت الكورة للجمهور كانت متعة و لما بقت سبوبة و اعلانات و رعاية و خناقات على لاعيبة و جمهور بيعلى على بعض مين هيشمت و يشتم أكتر ففقدت متعتها ... و لما عرفنا انتماءات المذيعين و المحللين و الصحفيين و الحكام لإاصبح رأيهم و قرارتهم منحازة حتى لو أنصفونا .
كنا بنعرف زمان نشجع الأهلى و نشجع الزمالك و نحترم اجتهاد الأسماعيلى و الاتحاد و ظهور طفرة فى أندية الشركات و الجيش و حرس الحدود بس نتجمع فى ماتشات المنتخبات كنا عارفين لاعيبة منتخب الشباب و الأوليمبى و شباب حسن شحاتة و برونزية شوقى غريب .
كنا ماشيين بمبدأ أنا و ابن عمى الغريب لما كان أى فريق مصرى بيلاعب بيلعب فى أى بطولة خارجية دلوقتى أنا واى حد على ابن عمى و بنتمنى فوز الفريق التانى على فريق بلدى أه و الله زى ما بقولك كدة .
تخيل تبقى مصرى ألاوى فبتتمنى فوز صن دوانز على الزمالك او تبقى زملكاوى و ماسك علم الترجى و بتشجعه ضد ممثل مصر فى البطولة طب ما نحترم انتماءات بعض و تتعلموا ان اختلافنا مش معناه انكم أعداء.
انا كأهلاوية عندى حساسية زايدة ضد ماتشات الأهلى مع المقاولون العرب و انبى مبحبش اتفرج عليها بس بحترم نجاح الفرقتين من أول ماتش الاهلى و انبى فى اخر دورى 2003 (أيام ما كنا بنستنى لاخر اسبوع فى الدورى عشان نعرف مين البطل) رغم ان بعد الماتش دة كان انفراجة للاهلى و جيل أبو تريكة و بركات و عماد النحاس و ماتش المقاولون فى نهائى كأس 2004 معجزة حسن شحاته فريق فى دورى الدرجة الثانية بيفوز على الإسماعيلى فيقابل الأهلى فى النهائى فى ماتش يعتبر لينا كأهلاوية مضمون برغم كل الظروف أهم 3 لاعيبة للاهلى فى المنتخب و يشاء القدر أن يصاب أمير عبد الحميد حارس مرمى الأهلى بعد استنفاذ الأهلى لكل تغييراته فيضطر شادى محمد انه يكمل المباراة كحارس مرمى للاهلى و قبل النهاية بلحظات و الاهلى مكمل ب 10 لاعبين تيجى كورة من عند محمد العقباوى حارس المقاولون تعدى على أحمد حسام فى اليمين يديها لعلاء عبد الغنى فى نص الملعب فتروح لإسلام شكرى اللى يرفعها برأسه لمحمد فيهم فتروح على يمين شادى محمد معلنة المقاولون العرب بطلا لكأس مصر رغم اعترافى ان دة من افضل اجيال المقاولون و ان دة نتاج أجتهاد المعلم حسن شحاته و لكن من اكثر المباريات وجعا على جمهور الأهلى بنكره ماتشات المقاولون و انبى مع الأهلى بقدر ما بيكره جمهور الزمالك مباراة ال 6-1 بكل لحظة فيها من اول جول رضا شحاته وصولا لهاتريك خالد بيبو بقدر ما بيكره جمهور الزمالك لجملة "بيبو و بشير بيبو و الجول" .
شجعوا كورة و متحرموش نفسكم من انكم تتفرجوا على فرق تانية أحترموا جمهور اسكندرية و هو بيعشق الاتحاد و الاسماعيلاوية و عشقهم لبرازيل مصر احترموا ظهور جمهور جديد لفرق جديدة عشان الفرق دى هى مصنع أحرف لاعيبة فى الدنيا محمد صلاح طالع على بازل من المقاولون العرب , ابو تريكة لحد ما كان عنده 26 سنة كان لاعب عادى فى نادى الترسانة و كان بيركب ميكروباص زينا و كان وقتها أحرف لاعب فى مصر بس مفيش نظارة مدرب عرفت تشوفه قبلها النجوم هيطلعوا من الفرق دى .
حب لاعيبة الزمالك حتى لو انت أهلاوى زى ما طول عمر الاهلاوية بيحبوا حمادة امام و حازم امام و حسن شحاتة و زى ما جمهور الزمالك بيحب أبو تريكة و صالح سليم و محمود الخطيب .
افتكروا ان الرياضة اخلاق و متعتها مش فى اننا نتخانق و أنك لو بتجرى جنب أخوك فى سباق هتتمنى انك تكسبه بس مش معنى كدة انك بتكرهه و دة اتجسد حرفيا فى ماتش محمد و مروان الشوربجى فى الاسكواش هفرح لو كسبت بس هبكى عشان اللى اتهزم أخويا .
شجعوا من غير شتيمة و استمتعوا بالساحرة المستديرة أكتشفوا انتوا لاعيبة جداد و حبوهم و شجعوهم لحد مايبقوا أبطال افرح لما فريقك يكسب من غير ما تجرح فى المغلوب افرح من غير شماتة عشان الرياضة مش هتبقى متعة لو بقت حرب .
"شىء مهين جدا لما مصدر سعادتك يكون هزيمة الاخرين و ليس تفوقك".