علق رئيس نادي الزمالك مرتضى منصور، على هزيمة فريقه أمس السبت، من فريق صن داونز الجنوب إفريقي، بعد أن أحرز الأخير ثلاثة أهداف في شباك الزمالك، دون أن يتمكن الفريق الأبيض من إحراز أي هدف، وذلك خلال المباراة التي أقيمت على ستاد لوكاس موريبى، فى ذهاب نهائي دورى أبطال إفريقيا.
وينشر إعلام دوت أورج أبرز تصريحات “مرتضى” خلال مداخلة هاتفية أجراها مع الإعلامي إسلام الشاطر ببرنامج “ملعب الشاطر”، المذاع عبر قناة “المحور”:
1-الدولة حاجزة على مستحقاتي في البنوك، ووزير المالية حاجز عليا ودي فلوس على ممدوح عباس مش عليا أنا.
2-الجون الأول اللي دخل في الزمالك ده أوف سايد 100% والجون الثاني “عبيط ميدخلش في طفل”، ولكن عدم تركيز أحمد الشناوي بسبب المنتخب ورغبته في أن يكون حارس مصر الأول شتت انتباهه.
3- بقول لكوبر “مش هديك ولا لاعب بعد كده”، أنا مش هعلي فيه وأهد الجهاز الفني لما يكون عندي ماتش مهم، ما إحنا بنمثل مصر برضو.
4- الجون الثالث في الزمالك خطأ بيحصل في كل دول العالم.
5- مباراة صن داونز تمثل “شوط أول” والجهاز الفني نسي النتيجة، وكل الدعم للجهاز الفني والطبي والأمني واللاعبين وأنا على يقين أن الشوط الأول في مصر الزمالك هيغلب 3/0
6- بقول للشناوي إنت حارس مصر الأول وثقتك لازم ترجعلك، وبقول لمن يروجوا إشاعات هروبه من الماتش “إتقوا ربنا”.
7- حمادة طلبة لاعب كويس بس أنا جبت لاعيبة صغيرة مكانه وعمر جابر عايز الإعارة من أول يوم، وحمودي وكوفي هربوا، هاتلولي لاعب أن سبته كده، ومكي قال عايز أمشي.
8- ده مش وقت حساب للاعبين والجهاز الفني و”مفيش رئيس نادي عاقل هينزل بين الشوطين يقول للاعبية إنت غلطت في ده”، ويغير جهاز فني، كل الثقة معاهم ومفيش إقالات، والجهاز زادت مرتباته قبل السفر.
9- في عتاب للنيل للرياضة بسبب إذاعتهم تقرير سخر فيه بعض الأهلاوية من الزمالك، بس الأهلاوية مش كده، هما محترمين، والتقرير جايب عيال صايعة، في أهلاوية أتوا من أخر جنوب أفريقيا يشجعوا الزمالك، والمفروض مخرج البرنامج كان قطع قلة الأدب دي.
10-الواد بتاع التوكتوك قال نفس اللي قاله الكلب الحيوان بتاع قناة تركيا معتز مطر، أنا قبل السيسي كنت بروح العباسية في 5 ساعات بسبب البلطجة ومحدش كان لاقي أنابيب ولا عيش ولا كان في كهرباء ولا أمن.. إحنا هنهزر.
11– بدعي الرئيس عبد الفتاح السيسي لاستلام الكأس وبقول للجماهير المحترمة تحضر، وواثق في الجهاز الفني وعتابي على مؤمن سليمان لما قال استقالتي في جيبي وأنا قولتله ده هبل ومتقولش الكلام ده تاني.
