وبأقول خيرتك فاختارى
على صفحة نيلك وسماكى
أنا قمرك واخترت مدارى
**********
لسانى عود أخضر
نابت فى أراضيكى
بأحلم عينيكى السود
تكون حتت سكر
وتحلى لى مرارى
انتى قمر الليالى
والأيد مهيش طايلة
يا اطلع لك العالى
ياتعدلى مسارى
**********
جايز أكون قاسى
يمكن أكون ناسى
لكنى مش ممكن
أبدا أخون ناسى
ورغم كل المرار
ماشى فى مشوارى
*************
يا أم العيون سارحة
فى أرضك الطارحة
لو زاد عليكى الهم
ها ازرع لك الفرحة
دايما فى أشعارى
***********
ظلمونى فيكى كتير
وضعت فى المشاوير
ورجعت لك تانى
يا أم العيون السود
فرحان وأملى كبير
هيكدبوا عليكى
ويقولوا با اتكبر
ويقولوا بااتجبر
اوعى تآمنى لهم
وكل ما يكدبوا
بعنيكى ها اتصبر
يا أم العيون سكر
**************
يا بيت مجمعنا
وحضن بيسعنا
لو ضاقت الدنيا
أنت القلب الكبير
حاسس بأوجاعنا
*********
لو الفراق مكتوب
عنك يا نور عينى
عمرى ما أبات مغلوب
وحقى هيجينى
وعن حبك ما أتوب
********
انتى اللى سحرانا
وانتى اللى أسرنا
مهما يزيد همك
فى القلب شايلانا
يارب جمعنا
خفف فى أوجاعنا
واحفظ لنا مصرنا
خليها لمانا
