نص الورقة التى ستقوم بقراءتها حضرتك حالا سبق أن نشرتها هنا قبل نحو 3 أعوام، أيام التمهيد لانتخابات «برلمان الثورة المضادة» التى هيمنت عليها عصابة إخوان الشياطين وتوابعها الإرهابيين، وأظن أن كثيرًا مما احتوته هذه الورقة ربما ما زال يصلح لرسم بعض ملامح ما يجرى الآن استعدادًا للانتخابات البرلمانية المقبلة، فقط اُستبدل واحد من رئيس عصابات النهب القديمة بمرشد عصابة الإخوان المدحورة، لكن حذار من اليأس.. وإلى النص:
- سلامو عليكم.
- عليكم السلام ورحمة الله وبركاته.. اتفضّلوا.
- يزيد فضل سيادتك.. والله إحنا جينا فى الميعاد مظبوط، من بعد صلاة الظهر، وإحنا منتظرين فضيلتك بره.
- ماعلش يا جماعة سامحونا.. كنَّا بنصلّى العصر.
- مافيش مشكلة فضيلتك.
- أهلا وسهلا.
- أهلا بفضيلتك.
- تشربوا إيه؟ تاخدوا شوية نعناع حلوين كده؟
- تشكر فضيلتك شربنا النعناع بره.
- طيب، إن شاء الله جهزتم أسماء المرشحين بتوع حزبكم.. بالمناسبة هو اسمه إيه؟
- اسم مين فضيلتك؟!
- حزبكم.
- «الوردة البيضاء».
- ده اسم الحزب ولا الفيلم؟!
- لأ، ده الحزب لو تكرّمت فضيلتك.
- O.K.. ع البركة إن شاء الله.. طيب معاكم أسماء مرشحينكم؟
- أيوه معانا فضيلتك.
- كام واحد؟
- خمسين فضيلتك.
- عندكم خمسين عضوًا فى الحزب؟! ما شاء الله.
- فضيلتك إحنا جايبين أسماء خمسين مرشحا علشان تتفضّل فضيلتك وتحطّهم لنا فى القايمة.
- أحطهم لكم فى القايمة (!!) ليه إنتم فاكرين القايمة دى إيه.. ملجأ أيتام؟! اسمعوا.. أنا ماعنديش ليكم غير 5 أماكن.. تاخدوهم، ولا بالسلامة تروَّحوا؟
- طب فضيلتك، اتكرَّم وخلِّيهم لنا 7 علشان الأولاد.
- همّ 5، ماعنديش فصال.. إذا كان «O.K» ماشى، ما «أوكهشى» يبقى بالسلامة ما تضيّعوش وقتى ووقتكم ووقت الست «الجماعة».
- خلاص فضيلتك اللى تجود بيه الست جماعتكم إحنا تحت أمرها.. زى بعضه خمسة خمسة.
- طيب قل لى أساميهم، وهات لى بكرة 100 ألف لكل واحد منهم.
- 100 ألف إيه فضيلتك؟!
- 100 ألف جنيه يا أستاذ، أمال هنحطّكم على القايمة وتروحوا النيابة وتاخدوا الحصانة مجانا كده، مش فيه مصاريف دعاية وزيت وسكر وبلاوى زرقا تانى كتير.. إنتم فاكرين قايمتنا سبيل «أم عباس»؟!
- على فكرة أنا أسمى «عباس».
- عاشت الأسامى يا سيدى.
- طيب فضيلتك ما تهزّ لنا المبلغ ده شوية، سيادتك عارف الظروف.
- لا ظروف ولا جوابات.. تدفعوا تدخلوا القايمة، ما تدفعوش يبقى كل سنة وانتم طيبين؟
- وفضيلتك بالصحة والسلامة.. يعنى المرشحين الخمسة بتوعنا عايزين لهم «نص أرنب» مش كده؟
- أيوه.
- وما فيش «ديسكاونت» فضيلتك؟
- لأ ما فيش «ديسكاونت» ولا بطيخ!
- طيب ممكن تخلّيهم لنا فضيلتك 3 مرشحين بس علشان النقدية مش متوفرة قوى الأيام دى.
- زى بعضه، أما نشوف آخرتها.. قل لى أسامى التلاتة، خلّصنى عايز ألحق أخطف المغرب.
- أنا.
- يعنى إيه أنت؟!
- أنا فضيلتك المرشح الأول بصفتى رئيس الحزب، وأسمى الكامل عباس سيد عباس.
- والتانى مين؟
- النائب الأول لرئيس الحزب.. سيد سيد عباس.
- ومين المرشح التالت؟
- مرشحنا التالت امرأة فضيلتك.. بتاخدوا امرأة؟
- بناخد.. بس زى ما انت عارف، لازم تكون ملتزمة.
- طبعا ملتزمة فضيلتك، دى النائب الثانى لرئيس الحزب، ومراتى كمان.
- أنعم وأكرم.. اسمها إيه؟
- مدام رانيا فضيلتك.
- قل لى اسمها الثلاثى؟
- تفيدة عويس الـ....
- إنت مش قلت «رانيا»؟
- أيوه ما هى «رانيا» هى «تفيدة».
- وده ليه.. علشان الحرب خدعة؟!
- أيوه.. بس يا ريت فضيلتك تقول لنا هتتكرّم وتحطنا على القايمة فى ترتيب إيه؟!
- سيبنى وأنا أختار لكم ترتيبا على ذوقى.
- والنبى قول لى دلوقتى فضيلتك.
- اللهم صلِّ وسلم عليه، شوف يا سيدى.. أنا عندى مكان فى المنيا فى التاسع وفى دائرة «شبرا الحيط» فيه مكان تانى فى العاشر.. وفى دائرة «حلايب وشلاتين» عندى كرسى فى الخمستاشر.
- فى الخمستاشر؟!!
- أيوه.. الهوا فيه يردّ الروح.
(طبق الأصل المسجَّل للجلسة)
