كشفت هند سعيد صالح، ابنة الفنان الراحل سعيد صالح أسباب عدم حضور الفنان جنازة والدها، وقالت: «بعد إذنكم أنا بطلب من كل اللى فكر وقرر إن الفنانين ماعندهومش أصل وعندهم جحود عشان محدش جه جنازة بابا، بدل ما يشغل نفسه بده يشغل نفسه بالدعاء ليه.. أفيد له لأنه محتاج ده.. لحظة ما سعيد صالح توفى أنا اللي قررت سرعة الدفن.. لأن إكرام الميت دفنه».
واستكملت هند على صفحتها بموقع التواصل الاجتماعي «فيسبوك»: «ولأن بابا كان موصي يدفن في مسقط رأسه في المنوفية، ولأن كان عندي سفر ساعتين عشان أوصل للمقابر، ولأني كنت عايزة الحق نور ربنا، ولأن حاجات كتير مش مضطرة أشرحها.. باختصار أولوياتي أدفن أب توفى، مش فنان توفى، طبعًا أنا عارفة إن مصر كلها حزينة عليه وده على راسي.. بس ده مش سبب لاتهام حد بالجحود.. الفنانين دول أهلي نمرة 2.. ومحدش سابني.. وعلى ما الناس عرفت كنت أنا سافرت».
وأضافت هند: «واهتمامي الأول والأخير كان سرعة دفنه.. وبدل ما كان 1000 واحد هيمشي في جنازته في القاهرة لقيت محافظة المنوفية كلها في جنازته هناك، واللي هنا واللي هناك عند ربنا واحد في الأجر والثواب، فلو سمحتوا ادعوا له بس هو محتاج ده ولا حاجة غير ده، ومن فضلكم كمان مرة محتاجة أحزن على أبويا في سلام مش في مهاترات لا هتودي ولا هتجيب لأنه هو أصلاً في حتة تانية خالص.. والعزاء إن شاء الله الثلاثاء في مسجد عمر مكرم».
