عشر سنوات
وأنا مشنوق على مواضيع / ومانشتات
وأنا مصلوب على الصفحات
كما الأحياء / كما الأموات..
عشر سنوات
باغزلك حروف صبرى
شراع الرحلة والصحبة / وأتوه فيكي
وأدفن نفسى في المكتب / وهات يا عياط
وأرجع تانى / أخدك حضن تحت الباط
وشد رحالى لشوارع / أدور لى على موضوع
عشر سنوات
في وشوش البشر حكايات
في الأتوبيس / طابور العيش / وع الكورنيش
وأنا وانتى / ما بين الناس / ولاد الإيه
والبسطاء / حكاية صبر ومناهدة
وحبر.. / وحرب ومهادنة
عشر سنوات
وأنا اللى وقفت للسلطان
في عز الضرب في المليان
في كل ميدان / عشان ما تكونى سلطانة
عشان ما تكونى أيقونة
عشر سنوات
وأنا صوتى ماهوش أعلى
من صوت الرصاص الحى / لكنى بهاتی
بآهاتى في كل ميدان / لأجل ما جبلك العنوان
عشان تكملى الرحلة
عشر سنوات
وأنا عمرى ما كنت جبان
وعمرى ما خفت غير منك
عليك انتى
