القائد: يا جماعة.. يا جماعة الخير.. يا إخواننا لو سمحتم سكوت شوية من فضلكم.. عايزين نبدأ الاجتماع..
(الجلبة والضجيج لا تزالان على حالهما).
القائد (منفعلًا): يا إخواننا سكوت لو سمحتم.. سكوت يا غجر يا ولاد ال....
(صمت وهمهمة).
القائد: بسم الله والحمد لله والصلاة والسلام على سيدنا رسول الله، أما بعد فعلى البركة إن شاء الله، نبدأ هذا الاجتماع التاريخى الرهيب و....
العضور رقم 2: يا سعادة الباشا...
القائد: أيوه يا سيدى، نعم، عايز إيه؟
رقم 2: ممكن سعادتك لو سمحت، تقولّنا إيه جدول الأعمال؟
القائد: أعمال؟! أعمال إيه؟.. ما عرفش.
العضور رقم 1: أنا رأيى يا باشا مافيش داعٍ لجدول أعمال ولا جدول بطيخ.. إحنا نتكلم كده سعادتك، مسطباوى.. يعنى كل اللى تطق فى نافوخه حاجة يقولها، وإذا لاقيناها فى المعقول نمشيها، وكل عام أنتم بخير.
القائد: اقتراح بنّاء فعلًا بتاع «المسطباوى» ده.. اتفضلوا افتوا.
العضو رقم 3: طيب أنا شايف سيادتك نعمل بيان ونذيعه على الشعب بسرعة علشان الناس تعرف مبادئ ثورتنا المضادة المباركة دى.. إيه رأى سيادتك؟
القائد: رأيى؟! رأيى فى إيه يا رجل يا أهبل إنت.. يعنى بذمتك الواسعة اللى أنا عارفها كويس، عمرك سمعت عن ناس عملوا ثورة مضادة وراحوا اتكلموا مع الشعب؟!.. شعب إيه يا حمار، إذا كنا احنا عاملين ثورتنا دى أصلا ضد (كذا) أهل الشعب.. ممكن بقى تتلهى على عينك وتسكت خالص.
العضور رقم 4: o.k يا قائد سيادتك طبعًا عندك حق، بس أنا شايف برضه إنه ما يضرش لما نعملنا شوية شعارات ومبادئ على ما قُسم كده حتى تكون هاديًا ونبراسًا لنا فى حركتنا.
القائد: حلوة «نبراسًا» دى، ع العموم أنا موافق ع الفكرة.. بس من غير «نبراسًا» وحياة والدك.
العضور رقم 1: أنا عندى شعار حلو قوى يا قائد، ممكن سعادتك تسمعه؟
القائد: قول يا فالح.. سمعنا.
رقم 1: هوّ الحقيقة شعار مقتبس من المطربة الكبيرة جواهر..
القائد: يا سيدى قولّه وخلصنى.. جواهر، خناجر، مش مهم.
رقم 1: يا باشا الست جواهر بتقول: «أنا لو جابولى الأمريكانى والإنجليزى واليابانى، أنا أقولّه لأ.. لأ لأ».. إيه رأى سيادتك يبقى ده شعارنا؟
القائد: الله يخرب بيتك.. بأه بالذمة إنت تنفع تبقى عضو مجلس موقر لثورة مضادة مباركة..؟!
رقم 1: ليه كده يا باشا، هو أنا غلطت فى حاجة، لا مؤاخذة؟!
القائد: يا بجم أفندى، إحنا ثورة مضادة أيوه، بس ما بنشتغلش ورا رقاصة.. ثم يا جاهل إزاى يبقى شعار ثورتنا فيه كلمة «لأ»، فضلا عن أن تكون هذه الـ«لأ» للأمريكانى والإنجليزى؟.. إنت أعمى يا ابنى مش شايف ولا فاهم حاجة أبدًا خالص ألبتة..
العضور رقم 5: طيب إيه رأى سعادتك يا باشا نخلى شعارنا «إحنا اللى خرمنا التعريفة»؟
القائد: «تعريفة»؟!.. يا أخى، رغم أنى عارف أنكم صيَّع وحرامية، لكن كان عندى أمل يبقى فيه فى نافوخكم شوية من صنف العقل.. يا بنى آدم، بذمة أهلك عمرك شفت ناس محترمة عاملة ثورة مضادة، ومجلس قيادة وبَلا أزرق من ده كله، وتطلع تقول للخلق «إحنا اللى خرمنا التعريفة»؟!.. تكونش فاكر إنك ح ترجع تانى تسرح بامشاط وفلّايات؟!
رقم 5 (تانى): طيب يا باشا، ينفع نخلى الشعار «إحنا اللى خرمنا الدولار»؟
القائد: قلت لك أخرس خالص، ولا عايزنى افتح دماغ أهلك؟!
العضور رقم 4: يا جناب الباشا القائد، أنا عندى اقتراح يحل المشكلة، ويتميز بسلاسة المبنى وسهولة المعنى.
القائد: اتفضل أتحفنا يا فيلسوف الغبرا.. بس من غير «نبراسًا» الله يخليهم لك.
رقم 4: سعادتك طبعًا عارف إن الثورة بتاعتهم كان ليها شوية شعارات وأهداف، ممكن احنا ناخدهم وبعدين...
القائد: وبعدين، نعمل عليهم ملوخية.. مش كده؟
رقم 4: لأ يا باشا ما اقصدش، أنا قصدى نجيبهم ونقلبهم.. يعنى المقاطيع بتوع الثورة كانوا بيهتفوا: عيش، حرية، عدالة اجتماعية، كرامة إنسانية.. نخلى احنا شعارنا جوع وفقر وقهر وظلم، وبهدلة وقلة قيمة، لا مؤاخذه.
القائد: أنا لا مؤاخذة، موافق.. انتهى الاجتماع.
