سمر صلاح تكتب -سيب الدنيا تحب بتحب
؟ بتحب أهلك و أخواتك و أصحابك ؟بتحب نفسك و انت معاهم بتعرف تقول لهم ان أنت بتحبهم و لا معتمد انهم كدة كدة موجودين ؟ بتشكرهم لما بيعملوا عشانك حاجة حتى لو بسيطة و لا معتبر ان دة واجب عليهم ؟ هتعرف تقول لها انك بتحبها ولا لازم لما تقعد مع أصحابك تقول لهم لا هى إللى تقول اصل انا الرجل الغامض بسلامته و لازم اكون تقيل . و انتى بتعرفى تحسسيه انك بتحبيه و لا لازم تسمعى كلام صاحبتك إللى بتقولك اتقلى عليه ؟ اقولك اتقلى عليه و هو يتقل عليكى كملوا الحرب يا جماعة ما هو اصل الحياة ايه غير أننا نعذب بعض و نكره بعض فى عيشتنا .. مش هشام عباس قال سيبها تحبك و حبها تسيبك !! نتكلم جد بقى هو مين إللى قالك كدة ؟ يعنى مين صاحب الافكار النيرة إللى عمالة تتورث دى ؟ يعنى مين فهمكوا ان الحياة كدة و الحب كدة و الله الست ام كلثوم كان عندها حق لما قالت ياللى ظلمتوا الحب و قولتوا و عيدتوا عليه قولتوا عليه مش عارف ايه ..العيب فيكم يا فى حبايبكم .. اه و الله عندها حق الست .. العيب فيكم فعلا. الأساس في العلاقات الراحة مش العذاب.. الامان مش الخوف مش أننا نفضل نجرى ورا بعض المفروض ان الحياة اسهل من كدة بكتير تعرف كام علاقة كان ممكن تكمل لو تستفتى قلبك ؟ لو لما تزعل تواجه و تعاتب لما المواقف تخليكوا تعرفوا بعض بدل ما تشيلوا من بعض و تكرهوا بعض بالبطىء تواجه و تفهم بدل ما تسيب دماغك لسوء الظن ؟ هى بتعاتبك عشان تصفى لك مش عشان هى نكدية و زنانة و هو بينسى تواريخ مناسباتكم المهمة عشان هو عقله شغال اكتر من قلبه زى حضرتك و فاهم ان هو كدة بيعبر عن حبه مش عشان بطل يحبك .. تخيلوا ؟ - فرقوا بين " العلاقات المجهده الى تستنزف كل طاقتك" والعلاقات الى محتاجه " مجهود علشان تنجح " . اقولكو حاجه بقيت بستغربها جدا دلوقتى علاقات الناس ببعض بقت مجهده جداا. يعنى الطبيعى انه جوا العلاقه نفسها نحتاج مجهود ، مجهود ننجحها ، مجهود نزقها قدام ، مجهود نفضل نحب بعض ونحترم بعض كل يوم اكتر من إللى قبله مجهود اننا نحط ( اهداف مشتركه ) علشان نحققها كل فتره .. مجهود علشان نحافظ على قوتها وفى حالات غضبنا منقررش قرارات غبيه . دا المجهود الطبيعى والمنطقى الى لازم نبذله علشان ننجح اى حاجه فى الدنيا دانت لو عايز تعمل فنجان قهوة هتعمل مجهود لحد ما تظبطه. لكن ( العلاقات المجهده ) هى العلاقات الى بتحتاج مجهود فى بديهيات مش مطلوب يبقى فيها مجهود يعنى مش طبيعى يبقى فى مجهود لما تقولك ( واحشنى عايزه اشوفك ) فتطلع عينيها لحد ما تشوفها دا المفروض يكون الجزء السهل على فكرة . مش المفروض انه يبقى صعب عليك تتكلم معاها او تلاقى وقت ليها ولا الاعتراف بالمشاعر لازم يبقى صعب ابدا . ولا برضو للراجل لو طلب منك دعمه وانك تقفى معاه فى لحظات ضعفه او اضطرابه او انه لما يحتاج يشوفك يلاقيكى دا المفروض يكون إللى بيحصل من غير ما يطلب بس دة برضوا الجزء السهل مش المرهق. انما لو علاقه كل شيء فيها " صعب " يبقى هتلاقى نفسك بتضيع عمرك كله متخيل انه دى كدا العلاقات وانه دا الطبيعى و دا غلط جداا وهيحرمك من حياة حلوة تستاهل تعيشها . اعرفو امتى يكون الجانب دا سهل فى العلاقات ؟ وامتى يكون المجهود منطقى و اخيرا حددوا من الاول انتوا عاوزين تكملوا حياتكوا مع الناس دى و لا لأ يعنى لو حضرتك عاوز تتجوز واحدة محجبة متروحش لواحدة مش محجبة و تقول لها البسى الحجاب و متروحش لواحدة بتشتغل و تقول لها لازم تقعدى في البيت متروحش للى جسمها مليان شوية و تقول لها لازم تخسى و متروحش للسمرا و تقول لها انتى وحشة و لا للبيضاء تقول لها أنا بحب البنت السمرا .. متكرهوش الناس فى عيشتها من فضلكوا " أقبلونا كما نحن او اتركونا كما نحن " .