سمر صلاح تكتب -ديسمبر ... بداية مش نهاية
ايام و ينتهى عام و يبدأ عام جديد بداية جديدة نتمناها سعيدة نهاية لكل الأوجاع .
بداية ننظرها بفارغ الصبر أمل جديد و شمس جديدة بنهنى بيها بعض و احنا بنتمنى تكون أجمل من اللى عدت ، بداية جديدة على الأبواب متطلبوش منها تكون أفضل عشان هى مجرد رقم بيتغير كونوا انتوا الافضل احنا بس اللى قادرين نغير و نتغير .
اتمنى الخير لنفسك و لغيرك مع بداية السنة الجديدة امسك ورقة وقلم و اكتب اللى بتحلم بيه و انت عارف انك هتطله الورقة دى اخر يوم فى السنة الجاية و هتقول الحمد لله كل دة اتحقق عشان مهما كان اللى فات مليان حاجات بتوجع اللى جاى كله هيبقى خير اشكر دايما ربنا انك بتعرف تعدى و تقوم "كن ممتنا للظروف" عشان هى اكبر مقياس لتصنيف الناس فى حياتك .
زى كل سنة فقدنا ناس ووحشونا و ناس اتولدت أدونا أمل فى اللى جاى.
سنة علمتنا ان الموت مالوش سن و أن ستر ربنا مالوش اخر ، علمتنا ان الصداقة مش خروجات و الجدعنة مش مكالمة تليفون و رسالة و ان الحب مش بس كلام حلو و النضج مالوش علاقة انت عندك كام سنة .. إن التدين و الدعاء مش على الفيس بوك و ان اهلك اهم شىء فى حياتك .. ان كلام الناس عمره ما هيخلص و انت اللى هتختار رد فعلك يا هتسمع و تعدى و تكمل وتسيب اللى يقول يقول يا هتقف عنده و تقف !!!
كل سنة بتعدى بتعرف ان كل حاجة فى الدنيا ارزاق ان الجواز رزق و الشغل رزق و الفلوس و الاولاد رزق و ان حب الناس دة احلى رزق و إن التجارب بتعلم و تقوى مبتكسرش حتى لو وجعتك و ان السنة اللى هتكبرها هى مجرد رقم المهم قلبك و عقلك يكونوا بيكبروا و ان صحتك بالدنيا و اى حاجة غيرها تتعوض و ان راحة بالك اهم بكتير من انك تستحمل تبقى موجود مع ناس مش شبهك و مش حاسين بقيمتك لسة عندك وقت تختار دايرتك و تحدد مين اللى هيكمل معاك و مين اللى لازم يطلع من الدايرة دى و هتعرف تكمل من غيرهم على فكرة .
ابدأ و انت بتقول لنفسك الكلام السلبى مش هسمعه و ان الاعتذار عمره ما كان قلة قيمة و ان التسامح مش ضعف و الطيبة مش هبل .. و اعرف ان العتاب شىء راقى بس مش كل الناس تستاهله يعنى خلى عتابك غالى للشخص الغالى .
و لسة ..........................
كل سنة هتعدى هتتعلم منها درس كل سنة هتعدى هتخسر فيها شوية و تكسب شوية غيرهم هما 24 قيراط هتاخدهم كاملين .. لسة هتقابل و لسة هتفارق لسة فى ناس هتموت و ناس هتتولد نزل الستارة على السنة دى بأوجاعها و حلوها و مرها متستناش اعتذار و لا ندم من أى حد وجعك متستناش ان اللى كان مصدر الأذى يرجع يصلحه.
كل اللى جاى ليك أنت عشان كل اللى عدى من حياتك عمل دوره صح زى ما كان مكتوب انت و شطارتك بقى ختار ان انت تبقى سعيد افتح باب قلبك لسنة جديدة لبداية جديدة ..
شكرا ..
اما عنى .. شكرا لكل دروس السنة دى .. شكرا يا رب انك بتخلينى اقع و اقوم و انك بتوقف لى ناس طيبين شكرا لاهلى اللى من غيرهم كانت هتبقى صعبة كتير شكرا لاصحابى واحد واحد عشان كانوا دايما سند .. شكرا لكل حد كسبته السنة دى وجودك فرق كتير .
سنة حلوين يا حلوين .