سمر صلاح تكتب -صورى يا فندم
تقدر تقول كأننا..
.. عاملين نفسنا يعنى Act As
كأننا أصحاب .. كأننا اخوات دة زى بابا دى زى طنط .. كأننا مرتبطين كأننا متجوزين و كأننا متطلقين .. أه و الله زى ما بقولك كدة .
أرتباط صورى و جواز صورى و طلاق صورى و حياة بنعيشها و كأننا عايشينها طب ليه ؟ خايفين من الوحدة و لا خايفين من الناس و لاخايفين نبعد و منعرفش نعيش ؟
كام واحد فى حياتك بيخليك تقف تسأل نفسك هو انا ابقى له ايه ؟ احنا اصحاب و لا معارف و لا محطة فى غيرها فى كل مكان و لا طابور واقف فيه انا و غيرى؟
هو احنا بنعمل فى نفسنا كدة ليه ليه بنحتار و نحير الناس معانا ما هو يا تحدد يا تمشى
Take it or leave it
شوفت سهلة ازاى ؟ ما تحسموا المواضيع من غير وجع و لاعشم حطوا كل واحد فى مكانه بدل ما نغرز الغرزة اللى بعضها هنخسر ومش هنطيق نبص فى وش بعض تانى عشان دة الغرزة اللى بنغرزها بعد ما ننفجر و نواجه .
أخطرهم فى رأيى هو الطلاق الصورى .. عشان الشكل مضطرين نكمل و الحياة تمشى عشان الناس متقولش ازاى نبقى جايبين اخرنا و مش قادرين نكمل و مش قادرين ننفصل بس كل واحد فينا عايش فى عالم كل واحد فى وادى تانى نبقى فاكرين اننا كدة بنمشى الدنيا بس احنا بنوقفها بالبطىء بس هو المفروض حضرتك يا تحل مشاكلم وتكمل يا تقف و تنهى و تعيش و تدى فرصة للطرف التانى انه يعيش بدل ما نعيش ميتين و غالباهنغلط .
النجم التانى التانى بقى اللى تقريبا خبط علينا كلنا هو الارتباط الصورى على رأى سيد مكاوى "نبقى حبايب و مش حبايب"
يظهر الاستاذ يهتم .. يحاسب و يغير و البسى دة و متلبسيش دة كلمى دة و ابعدى عن دة متتأخريش برة .. صاحبتك دى بلاش منها و يعدى الوقت وهما كدة و لما تحصل اللخبطة اللى بعدها بيبقى وجب السؤال بتاع طب انا ابقى لك ايه فيرد يقول هو انا عمرى قلت لك ان انا بحبك و تبدأى تسألى فى نفسك هو انا كنت فاهمة غلط طب هو انا للدرجة دى مينفعش اتحب .. لا هو انتى كنتى تتحبى الحقيقة بس اختارتى حد متردد بس يمكن كان اعمى مش شايفك مش حاسس جيتى فى وقت غلط و شيلتى شيلة مش بتاعتك يمكن لما صارحتيه هرب .. مرة خايف عليكى مرة اسف مرة ناشف يمكن انتى تفهمى ومرة مش عارف يكمل مرة حاول و مش قادر .
Fair Enough عشان نبقى
فى بنات دلوقتى بتعمل كدة صاحبى اللى محبوس فى الفريند زون بس انا عاوزاة يهتم و يغير و يحتوى و ساعة ما الراجل يقول لها انا بحبك تقول له لا انت زى اخويا و مستنية منه نفس التصرفات و عاوزاة يفضل أمانها لحد ما تلاقى غيره فتقول له اسفة انا همشى .. تقريبا مش بنلاقى اللى بنحبه فبنحب اللى نلاقيه .
على النقيض بقى الناس اللى بتقبل تكمل فى العلاقات المشوهة دى عشان مفيش بديل .. عشان بتحب هو مدمرها بس هى مش قادرة تسيبه .. متكتفة.. مسلوبة الارادة معمية عن كل اللى بيعمله .
حب مشوه حتى النخاع .. "أصل الحب مش بإيدينا جملة قاتلة مبررة لكل خطأ أو خيانة أو نزوة " .
الحقيقة أن الانسان عموما بيعرف يتحكم فى افكاره و مشاعره .
اوعى تسمح لحد انه يدوس عليك و ميعملش حساب لا ليك و لا لمشاعرك .. الحب هو الأساس هو اللى هيخليك تحب نفسك مش تحس انك قليل و راضى ببقايا انسان "نص قلب .. نص عقل .. نص امان و نص راحة " انت تستاهل حياة طبيعية كاملة .
اوعى تبقى ضعيف تحت مسمى الحب عشان دة الخذلان بعينه .. أوعى متلاقيش اللى تحبه فتحب اللى تلاقيه دور كويس هتلاقى حد مستنى يبقى معاك .. حد بجد مش صورى و مش كأنه ...