سمر صلاح تكتب -ماتزعلش
كل واحد فينا عدى كتير بزعل .. وجع و حزن على اللى فات او خوف من اللى جاى و كداب اللى يقولك انه متهزمش ، اللى اتخان و اللى فارق و اللى ودع و اللى اتظلم و كله بيعدى بس بيعدى ازاى ؟
الحقيقة ان نسبة كبيرة من اساتذة التنمية البشرية أجمعوا ان اى ازمة هتعدى لما أنت تقرر لها أنها تعدى .
مقال النهاردة أنتوا اللى كتبتوه .. لما سألت الناس لما بتكون زعلان بتتصرف ازاى كل واحد فيكم كان ليه الطريقة اللى بيعدى بيها .. ناس كتير قالت أن الحل فى الرجوع لربنا أنك تصلى و تدعى و تقرب و تروح لربنا و تشتكى له لحد ما تحس انك هديت .. ناس تانية اختارت العزلة و ان وهو لوحده هيعدى يتمشى لوحده فى مكان هادى و يسمع حاجة بيحبها لحد ما يفصل و ناس تانية قالت الفضفضة اللى عدى بأصحابه و اللى قال بقعد اتكلم مع "ماما" .. ناس تانية قالت النوم و دة عدد كان مفاجىء و أجمعوا أن النوم وسيلة قوية جدا للهروب من الواقع "أنام و أصحى و أنام وأصحى لحد ما ابقى كويس" ناس تانية اختارت العتاب انك تمسك اللى زعلك و تنفجر فيه لحد ما تهدأ وتصفى له ناس تانية اختارت تنفجر فى أى حد "بس متأكد انه هيستحمله" لحد ما يعدى و العدد الأكبر قال "الوقت" .. ناس اختارت "السحلة" انه يتشغل فى حاجة تاخد كل وقته لحد ما يعدى زى دور البرد ياخد وقته و يمشى بس وانت مش مركز معاه .. ناس قالت الأكل و ناس قالت السفر ناس قالت "بعيط كتير" و ناس بتبعد و ناس بتقرأ ناس بتتخانق و ناس بتطلع طاقتها فى الشوبنج و الفسح ناس بتغير لبسها و اسلوب حياتها ناس غيرت نظام أكلها و ناس لعبت رياضة .
أفكار كتيرة عشان نعدى و نقع و نقوم و كلها أفكاركم يعنى اتنفذت قبل كدة انا قصدت أجمع كل حلولكم يمكن لمبة عندك تنور لحد تانى .. طب هو الحل ايه ؟
الحقيقة ان انا بقالى فترة بدور على حل لنفسى و للى حواليا و بعد ما دورت كتير لقيتها فى دراسة شارك فيها عدد مش قليل من اساتذة التنمية البشرية لما أتسألوا نفس السؤال "اتخلص من زعلى ازاى " ؟ أجمعوا أن الحزن هى الحاجة الوحيدة اللى بتتولد كبيرة بس مع الوقت بتصغر لحد ما تتلاشى و معظمهم اجمعوا ان مهما كان زعلك و ألمك كبير هو بالضرورة ليه حل و اقترحوا أن أول خطوة عشان تعدى زعلك هى انك تعبر عنه و ان الوسيلة الأفضل هى "الكتابة" لانها طريقة هايلة و فعالة جدا عشان تعبر عن اللى جواك من غير كسوف و لا تفكير طريقة تتخلص بيها من طاقتك السلبية و قالوا ان تانى خطوة هى "التواصل مع الاصدقاء" و ان دى لوحدها كفيلة تعدى بيك مسافة كبيرة جدا من الزعل و الحزن "يتعافى المرء بأحبته"
وبعدين "الراحة و النوم" انك لما تاخد كفايتك من النوم و الراحة و تدى جسمك حقه هيساعدك و يخلى عندك طاقة .. الكسل بيزود الطاقة السلبية و أن أكتر خطوة بتساعدك تتخلص من الطاقة السلبية هى "الرياضة" أو المجهود البدنى عموما بس بالعقل و اقترحوا من ضمن الحلول "التأمل" انك تشوف مناظر حلوة و تشم هوا نظيف انك تخرج فى مكان مفتوح فى ورد و مية .. الدنيا جميلة.
اتعامل مع حزنك دايما انه شىء طبيعى ..شعور صحى جدا انك تقع و تقوم تزعل شوية و تفرح شوية مفيش شعور بيدوم لا حب و لا كره .. لا زعل و لا فرح زى الليل و النهار لا ليل على طول و لا نهار ونور على طول خد وقتك لحد ما تعدى الوقت كفيل انه ينسيك و يطبطب عليك خف و عدى بالطريقة اللى تناسبك بس المهم متسيبش الوجع ياخد من روحك و ياكل فيها خليه يعدى بس ميعديش عليك .
أنت عايش مرة واحدة متضيعهاش .. عمرك هيتقاس بلحظاتك الحلوة و افتكر ان كله هيعدى لما انت تقرر له يعدى من غير ما تستسلم له .. زى ما قال العندليب "دى اللحظة اللى تعدى بتروح متجيش".