سمر صلاح تكتب - المسكينة
يا حرام .. مسكينة عدت التلاتين و متجوزتش مع انها حلوة و مؤدبة .. مسكينة اتجوزت واحد احلى منها و الناس بتتريق عليها مسكينة مخلفتش مع انها متجوزة من فترة يا حرام مش لاقية شغل يا عينى دى متبهدلة فى شغلها .. مسكينة اتطلقت دى مسرفة بتصرف فى التفاهات دى بخيلة مش بتدلع نفسها.
بس يا سيدى و هتفضل مسكينة من يوم ما تتولد لحد ما تموت و تبقى المرحومة المسكينة إللى عاشت و ماتت و محدش عارف هى مسكينة ليه .
و الله يا ست الكل أنتى مسكينة فعلا عشان بتسمعى و بتتأثرى و تحاولى ترضيهم ..
يعنى لو أنتى المسكينة إللى كبرت و متجوزتش فتحاولى جاهدة انك تنتقلى من مرحلة المسكينة الانسة إلى مرحلة الزوجة التعيسة (ما بنى على خطأ فهو خطأ) لو اختارتى غلط عشان إللى فى سنك بيتجوزوا هتلبسى فى الحيط لحد ما توصلى لمرحلة المسكينة المطلقة.. لو أنتى دلوقتي فى مرحلة المسكينة إللى معندهاش اولاد هتبقى المسكينة إللى ملحقتش تعيش شبابها و اتسحلت بدرى في تربية و مدارس .. طيب بما انك كدة كدة مسكينة تعرفى تتعايشى مع فكرة انهم هيفضلوا يقولوا كدة مهما كنتى ناجحة و راضية حتى لو بيتمنوا يكونوا مكانك يعنى علميا هما بينصحوكى عمليا بيدمروكى 
أنتى عارفة ان أنتى إللى هتحددى الطريقة إللى الناس هتشوفك بيها يعنى يا تفضلى مخلوق ضعيف مسكين يا حرام يا تبقى جيشك إللى محدش يقدر عليه .. أدى كل حاجة وقتها اتجوزى لما تختارى صح ، اشتغلى اشتغلى كتير كل الشغل إللى بتحبيه و مش بتحبيه عشان تاخدى خبرة و فلوس و تعرفى أنتى عاوزة ايه .. اعتمدى على نفسك من غير ما تبعدى عن الناس "خليكى مستقلة مش منبوذة ".
هى الغزالة اسرع و لا الاسد ؟؟؟!
أشهر المطاردات بين الحيوانات هى اصطياد الاسد للغزال بسهولة. انت عارف ان سرعة الغزالة تقريبا 10 اضعاف سرعة الاسد بس الغزال كائن "ملتفت " تجرى لما نفسها يتقطع و بعدين تلف تشوف الاسد بقى فين فيلحقها زيك كدة .. "الملتفت لا يصل".
فاكرين المثل إللى كان بيقول كل إللى يعجبك و ألبس إللى يعجب الناس " اقولك انا كل إللى يعجبك و البس إللى يعجبك و قول إللى يعجبك و اسمع إللى يعجبك و سيبك من الناس.
خليكى دايما عارفة ان نفسيتك هتفضل باللى بتقوليه لنفسك يعنى شكلك و عقلك و نفسيتك فى ايدك أنتى المرايا إللى الناس هتشوفك بيها .
خليكى من الناس الناضجة الناصحة إللى بتعرف تتصالح مع نفسها و بتدخل حياة الناس تنورها مش تطفيها الناس مالهاش دعوة بالكلاكيع و الحاجات السلبية إللى كبرتها معاك .. متدمنيش دور المسكينة الضحية و ترجعى تقولى اصل الناس هتقول ايه!!!
خليكى من الناس اللي بتزرع الورد مش تقطفه و اتعلمى تفردى ظهرك و تصلبى طولك بنفسك و متخليش حد خشبة فى ظهرك .. فهمتى يا مسكينة أنتى مش مسكينة أنتى بس فى مجتمع مساكين