سمر صلاح تكتب-زى الشمس........ ما تنطفى
الحقيقة ان انا عادة مش من متابعين مسلسلات رمضان انا من الفريق اللى بيستنى يشوف اكتر مسلسل علق مع الناس و حدوتة تنفعنى فبتفرج عليها بعدين من باب الفضول يعنى بس بتابع تريقة و ألش السوشيال ميديا و مناشدات للرجالة يبوقاكيوت زى ظافر وعمرو يوسف ولا كوميك اتعمل على اعلان بس أنا من الناس اللى بتتأثر بالمسلسلات اللى فيها حواديت و قصص واحيانا بضرب بيها المثل .
و بما ان موضوع الساعة السنة فى مسلسلات رمضان هومسلسل دينا الشربينى أنا لمحت مشهد مدته خمس دقائق بس كفيل أنه يحرق الدم لوقت طويل اكتر من مدة المشهد بمراحل .. مشهد عالمى مش بس عشان مكتوب حلو و لا ان الاداء مقنع لا هو المشهد يقهر عشان جاى على جرح كتير مننا مشهد على أد ما يقطع القلب ويحرق الدم و يخليك تلعن الحب وسنينه على أد ماهو متعب نفسيا لما تعرف أن فى علاقات كتير كدة و ان دة مش تمثيل وحبكة درامية يعنى .
ملخص المشهد أن "نور" عرفت أن خطيبها "عمر" خانها مع اختها قبل فرحهم بأسبوعين ، الكارثة الاكبر من اكتشافها للخيانة كان رد فعلها بعد ما عرفت .. أنا طبعا مستنية الدنيا تطربق على دماغ اللى خانوا و اشوف رد فعلها فإذا باللى اتخانت هى اللى راحت له و قالت له أنا اسفة حقك عليا وانا مسامحاك و لوكنت غلطت فى حقك قولى أنا قصرت فى أيه فى ايه و انا هصلحه قولى محتاج ايه و انا اعمله .. تخيل طب والله زى مابقولك كدة !!
أنا قلبى بيتقطع على بنات بتحب النوعية دى من الرجالة و بزعل عليهم لما بلاقيهم بيلوموا نفسهم على ندالة الشخص دة و يفضلوا يبرروا الخيانة والتصرفات الغلط و كأن ليهم الحق فى دة هتلاقى اللى تبرر انه خانها بانها قصرت فى أهتمامها بيه و اللى تبرر الضرب بأنها استفذته .. مالكوا بجد ؟
أنا بشوف بنات زى الفل تبقى ست البنات مشناقصها حاجة و ييجى واحد يكسر قلبها لدرجة أن البنت تصدق ان العيب فيها متسمعش كلمة حلوة حتى لو مجاملة و مصدقة ان المشكلة فيها مع ان و الله يا حبيبتى هو اللى معندوش ضمير .
هى فى المشهد دة اعتذرت ووقعت تحت رجله و طلبت منه انها تسامحه و اترجته ميسيبهاش الضحية بتعتذر للجانى و اللى أتأذى بيتأسف للى أذاه و اللى اتخان يركع تحت رجل اللى خانه .
ابتدى ينتشر نوعية كدة من الرجالة النرجسيين هما حرفيا بيبهدلوا الست اللى معاهم بيشرحوها نفسيا و بيخلوها متدمرة و عايشة مذلولة بتلف فى دائرة من البؤس و التدمير على عكس بداية ما يعرفها بيحسسها انها اميرة الاميرات و أول ما تبقى معاه وتبتدى التنازلات هووووووووووب تبقى أقل واحدة فى الدنيا تترمى و تتهان ويتلعب بمشاعرها و يحسسها بالذنب طول الوقت و بيعرف يقنعها انها مقصرة و يشككها فى نفسها وتكره الدنيا و تكره حتى ملامحها فى المراية هيدخلها فى تهديد و ابتزاز عاطفى انه اى حاجة هتعملها على غير توقعاته و طلباته هسيبها .. منتهى الاهانة و الذل .
المشهد دة فكرنى بمشهد فى مسلسل تحت السيطرة المسلسل دة كان بيتكلم على الادمان و حياة المدمنين وحياة المتعافين من ضمن قصص مدمنين المسلسل "على" و "هانيا" فى مشهد كدة على سلم هانيا لتاجر مخدرات بإيده مقابل جرعة زائدة من المخدرات بعد المشهد دة هانيا رجعت له و كأنه لم يؤذيها او كأن حقه يأذيها .
المشاهد دى للاسف بقت تتكرر يوميا بشكل او بأخر فى علاقات كتيرة ..
خلاصة الكلام متجريش ورا حد بيأذيكى ومتوصليش نفسك ان حد يجرح كرامتك و يهينك و المبرر اللى بتحطيه لنفسك انك بتحبيه صدقى امك لما بتقولك "ميستاهلش ضفرك" متخليش لحد يوصلك انك تصدقى أن الغلط فيكى حبى و استحملى و اصبرى وهاتى اخرك بس فى الحاجات اللى ينفع تعدى لكن لما تلاقى كارثة اقفى وثورى و انسحبى لما متلاقيش حل فوقة بدل ما تغرسى نفسك فى الطين أكثر .
افتكرى يا بنتى انك بنت ناس ..أهلك تعبوا فيكى و انتى تعبتى لحد ما بقيتى أنتى أوعى تتنازلى عشان تعجبى واوعى تتذلى عشان ميسيبكيش هو مش كتير عليكى أنتى كتيرة على أى حد امشى لحد ما تلاقى اللى يحبك ويقدرك و يخليكى تحبى نفسك و تحبى الدنيا حبى بس اللى يستاهل يتحب .
خليكى زى الشمس منورة متطفيش .