ايجى ميديا

نانسي إبراهيم تتحدث إلى محبيها لأول مرة بعد الحادث

في أول رسالة من الإعلامية نانسي إبراهيم لجمهورها ومحبيها بعد إصابتها في حادث منذ مايقرب من شهر ، شكرت كل أصدقائها وجمهورها علي ما أظهروه من حب و طمأنت نانسي الجميع علي حالتها الصحية .

وجهت نانسي رسالة إلى جمهورها و أصدقائها قالت فيها :

" الحمد لله رب العالمين ... على لطفه وكرمه ورحمته وجبره .

ميرسى لكل حد دعا لى من قلبه يعرفنى او ما يعرفنيش ، وكل واحد زارنى أو حاول يزورنى ، وكل حد كلمنى رديت أو معرفتش ، لكل واحد كتب post أو بعتلى رسالة .

بشكركم على طاقة الحب والخير اللى فتحتهولى واللى قوتنى ، وحمتنى ، ونورت بصيرتى على حاجات مهمة اوى كانت تايهة عنى .

بحمد ربنا على المنحة دى واللى بعتبرها كده أكتر من كونها محنة أو إختبار واللى لولاها مكنتش عرفت قد إيه بحبكم وبتحبونى من قلبكم .

من قلبى بحمد ربنا على نجاة إخواتى اللى كانوا معايا في العربية اللى كل لما بشوفها بفتكر قد إيه ربنا لطف بينا وكان بينا رحيم .

بشكر ربنا على الناس اللى ربنا حبانى بيهم ووهبنى حبهم اللى هونوا عليا الأزمة واللى كل واحد فيهم واخد نصيب من اسمه 《 الكرم _ الغلاوة _ والحمد _ والوفاء _ والشرف _ والشمم _ والتوفيق _ والطارقين بالخير 》 هما بقى عارفين نفسهم  بحبكم بجد من كل قلبى وربنا يقدرنى وأعرف أرد جزء صغير من طاقات الحب والإحتواء والتفانى اللى كل ما افتكرها جسمى يتنفض ومعرفش أتحكم في  دموعى واللى بتسبق كل كلمات العرفان والشكر اللى ممكن تعبر عن إحساسىي بيكم .

بحبكم جدا وربنا يتمم شفايا على خير علشان أمى اللى ماليش غيرها ومالهاش غيرى وإستحملت  إبتلاءات كتير واللى مش هتتحمل تانى صدمات ويارب أقدر أرجع لكم على خير وأبقى بينكم تانى وألمس حبكم من جديد وكل يوم أحمد ربنا على نعمه ، وربنا يشفى كل مريض ويريح كل تعبان ويزيح عن كل مهموم . 

الوحشة والألم مش بتحصل بالموت لكن بتقع بالفقد . "

وطلبت نانسي نشر رسالتها كما هي بلغتها العامية حتى تصل إلى محبيها ، لأنها كما قالت كتبت هذه الكلمات بحب و مشاعر طيبة نحو من تمنوا لها الشفاء و تريد أن يصلهم كلماتها كما هي .