ايجى ميديا

اشرف الشامي يكتب احلي قصائده الشعرية تذكرة الموت -

تذكرة الموت مع موسي وعيسى

فى محطة مترو.. على باب الحارة

جنب الكراكون.. فى مدرج كورة

تذكرة الموت مع انس وحسين..

حكايتهم طارحه.. اغانيهم مالحه

فى ملاعب طافحة

ونفق الموت فى شارع تسعين..

والكورة عندنا بتدور لسه ع صلاح الدين..

وبتسأل برضه ازاى النصر كان يوم حطين..

تذكرة الموت مع ديفيد ويس..

حكايتهم كانت مع عم امين

على باب الاستاد.. اشتروا علمين

وكانوا فاكرين.. انهم راجعين

وعشان الكورة وحبة هتافات.. شبابنا يموت

يا بلد.. مش عارفة تفرق بين الغاز وبين النبوت

ده كلام محبوس جوه الزنازين..

وده عزا مفروش وكلام فى الدين..

كان حلم الكورة فى ميدان عابدين..

وولادنا كتيير جوه الصندوق.. وولاد تانيين

ولاد تايهين من كتر الغاز..

ما هو كتر الغاز بقى م الالغاز..

وده واقف يدى الامر بصوت مسموع..

اضرب ما يهمك ايه مسموح ولا ايه ممنوع

وولادنا تنادى ع باب الاستاد..

افتحوا وكفاية كلمة ممنوع..

افتحوا وكفاية معدش رجوع..

افتحوا واسمعوا..كفيانا دموع

معناش غير طبلة واغنية..

افتحوا يا ولاد الداخلية..

احنا بنموت.. احنا بنموت

وسكت الصوت

وكان التشخيص من علقة موت  وخنقة غاز

وقنابل صوت

قلبنا موجوع.. وحصادنا دموع..

ولسه بنسأل ايه الموضوع..

سألنا الجان.. وعملنا لجان..

وكتير دورنا جوه الدكان..

مالقينا كمان غير صور الشهدا..

صرفنا فلوس.. تعويض منقوص..

واتارى الموت شكة دبوس..

عملنا برامج.. مذيع زعلان.. وضيف ندمان..

اعلامنا خلاص فتح الدكان..

والشهدا هناك فى جنة رحمن..

بقوا صورة وذكرى.. رحلوا عن بكره

ولسه الكورة من الممنوع..

لسانا ندور ايه الموضوع..

ولسه الجانى م الحساب مرفوع..

كفياكم موت.. كفيانا دموع..

قلبنا موجوع.. قلبنا موجوع