عمر طاهر يكتب:الدوشه ماليه الفصل
عمر طاهر يكتب:الدوشه ماليه الفصل
الأصل هو الوحدة
ولّا الزحام الأصل
اتدفعت المصاريف
وف جيبى صورة الوصل
سرحان ورا الشبَّاك
والدوشه ماليه الفصل
سارح بروحى بعيد
بره درس الحساب
اسمى معاهم لكن
اسمى ف كشف الغياب
«2»
نايمه العساكر فى الشوارع
والشوارع فى العساكر
وبكره الامتحان
وانا رايح مش مذاكر
هربت منى السطور
مش شايف نظرى ضعيف؟ ولاّ انا عجزت؟
أنا إيه باذاكر إيه؟
ومش مركّز ليه؟
هجم السؤال فى بالى
أول ما انا ركزت
لا الشاى قادر يغير
حاجه ف نفسى المسدودة
ولا حتى كنكة قهوة
خلّتنى أحب الأوضة
يا ستاير نقشك مين
بالغامق واتوصَّى بُه
الوقت بيجرى بسرعة
وانا قلبى على أعصابه
والكنبه نايمه سعيدة
الهوى سقّع مساندها
ودموعى لمّا بتنزل
بإيديا قوام باسندها
يا لجنه بعرض الكوكب
يا كوكب الامتحانات
الدنيا سؤال عايشينه
واختلفت الإجابات