ايجى ميديا

مش هنمشى ... عمرو يمشى
بقلم عمرو عبد الحق

هكذا حال أتحاد الكرة المصرى والذى طالما ما أطلق عليه أتحاد الكرة اليومى حيث أن الهارد ديسك الخاص به يعمل يوم بيوم يعنى بالبلدى كده حسب الأستفتاح .
ومن خلال قراراته العشوائية قرر بصورة غير مباشرة بقيادة الكابتن سمير وطنى أن يحاربنى بكل الطرق لكى أمشى فبعد أن أسقطناه هو ومجلسه من خلال جمعية عمومية شرعية أنقلب الحال وأصبح فلول الكرة يرددون بتفاخر :
" مش هنمشى ... عمرو يمشى " طبعا من نادى النصرومش عمرو بس وأنما أى واحد مش تحت الباط لازم يمشى ولأن كل واحد وله ثمن أو ديه أو ترضية أو موائمة أو تهديد أو ذعر أو خوف ... فأصبح فلول الكرة متخصصين فى التظييط ولكنهم واهمين لأنهم نسوا وجود الله وهو خير الماكرين .. أما المحاولة الأخيرة لأتحاد الكرة ( والذى منشغل فقط بمعارضيه والذى فشل فى تظبيطهم حتى الأن ) فأبشرهم بالفشل لأنك صعب جدا تشرب القضاء المصرى الشاى بالياسمين بتاعك حتى لو كنت بتقنع كل من حواليك أنك تقدر تظبط أى حد .. وطبعا أن أعذر كل الناس اللى بيصدقوه لأنهم شايفين أنك مطلع لسانك لكل المصريين ومحدش بيقدر يجى جنبك وتم أتهامك بجميع أنواع الأتهامات ومازلت مبتسما وواثق من قدراتك الياسمينية ولكن يا أبو الكباتن لسة فى ناس بتشرب شاى سادة ولو أضافة ليه هيكون شاى بلبن شريف .... أنصحك نصيحتين :
أولا : أخبر الاخوة المشتاقين أصحاب البدل يعرضوا برنامجهم الأنتخابى وتصوراتهم لمستقبل بدل من الشكاوى اللى خسروها كلها وبدلا من القضايا اللى انشاء الله هايخسروها كلها لانه من البديهى أن يرشح المشتاق نفسه فى الأنتخابات وليس فى البلاغات
أما النصيحة الثانية : بدل ماتتفرغ للمعارضين وتلاعبهم بغشم وتخسر كل وقتك الثمين فى المؤامرات والفتن أقدم لك جدول أعمال السنة المتبقية لك :
1- الدورى الممتاز يكون 32 فريق يعنى بعد قرارك التربوى بعدم هبوط أى حد من أسكندرية وأحنا فى فصل الصيف لابد أن تصعد 5 فرق وتلت من كل مجموعة فى الممتاز ب علشان يعملوا دورى من مجموعتين كل مجموعة 16 نادى وبالتالى اللعب يكون أكتر والمباريات تكون متسوقة أكتر والسبوبة الفضائية تكتر والرعاية تكبر والأستوديوهات التحليلية تبقى أكبر من معمل تحاليل البرج والناس تنسى الحزب الوطنى والفلول وأسرائيل وتتكلم عن مباراة " الأهلى والأميرية "
2- بعد قرارك العظيم بتحويل الممتاز ب الى الدرجة الرابعة بعد زيادة عدد الفرق من 48 الى 72 أنصحك بتقليد الفنان أحمد مكى فى مسلسل " الكبير أوى " وتخلى الممتاز ب 172 نادى علشان يكون الدورى "كتير... أوى ...جدى ."
3- لتفادى أزمة المادة 18 أعمل لايحة جديدة وطبعا الجمعية العمومية هتوافق عليها قبل حتى ماتعرضها وتخلى مواد اللائحة 17 بند فقط
4- بدل ماتدفع رواتب الجهاز الفنى للفريق الأول أعرض عليك فكرة جديدة وخصوصا أن المنتخب بلا مدرب منذ 3 شهور ومصر بلا رئيس منذ 7 شهور ومحصلش أى حاجة عادى جدا والدنيا حلوة ومفيش مشاكل .. أنصحك بالتعامل مع مدرب مصر الأول زى الأسبرين يعنى عند اللزوم فقط .. لما يكون عندك ماتش أبقى عينه قبلها بخمس تسع أيام ومشيه بعد الماتش بساعة
5- بخصوص القسم الرابع واللى أنت مبتعبروش علشان هما مش أعضاء فى الجمعية العمومية أنا رأيي تخليعم أعضاء علشان تزود عدد المؤيدين لك وتقلل من حجم المعارضين وليصبح أعضاء الجمعية العمومية 777
" بوينج" ولابد من تغيير أسم الدرجة الرابعة اللى الممتاز " D "

أعتقد بأتباع هذه النصائح ستختفى كل مشاكلك مع الأخرين وهتنسى عمرو وأعوانه .. والكل هيبقى مبسوط واولهم حسنى مبارك