محمد القصبجي يكتب-حوار ملتهب على حاجزتفتيش بالضفة الغربية ..عفوا ميدان التحرير !
بقلم محمد القصبجي
حوار ملتهب على حاجزتفتيش بالضفة الغربية ..عفوا ميدان التحرير !
نبض الشارع / محمد القصبي kasapi2005@yahoo.co.uk
يوميا أجتاز بمشقة متاريس ميدان التحرير ..اتأمل في حسرة الوجوه على الحواجز ..تشتعل دواخلي بالغضب حين يستوقفونني : بطاقتك يا أستاذ !
اداهمهم : لماذا ؟!
يحاولون حجب ارتباكهم بابتسامات السخرية
فلقد تعودوا من الجميع أن ينصاعوا لأوامرهم ..ووصلت العجرفة ببعضهم الى حد تصور أنهم يمكن ان يملوا شروطهم على طنطاوي وعنان وشرف ..هذا الوزير يبقى وذاك يرحل ..والغالبية العظمى من المصريين تتابع مايجري في صمت لاجدوى يقينا منه حتى لو كان مشحونا بالاشمئزاز ..وحين قرر مواطن مصري ألا ينصاع ورفض أن يظهر لهم بطاقته ربطوه في نخلة وانهالوا عليه ضربا كما نشرت الصحف..أيكون هذا أيضا مصييري ..لكنني لن أستجيب لهم :
- يا أستاذ اذا كنت عاوز تمر لازم تظهراثبات الشخصية.
في عناد : أظهره لمين ؟
في نفاد صبر : لنا
في هدوء : طيب يا جماعة أنا تحت أمركم ..بس مش تعرفونا بنفسكم الأول !
وكأنني ألقيت عليهم قنبلة نووية :أيه يا حاج ؟ ..هو أنت مش من هنا والا أيه !
-لا والله يا بني ..انا من هنا ..ودا طريقي اللي بمر عليه لشغلي كل يوم من 35 سنة ..وعمري ما شفتكم الا الأيام دي ..وخايف احسن تكونوا أنتوا اللي مش من هنا !
- -هو حضرك بتشتغل أيه
- - صحفي ؟
- - آه من المطبلاتية بتوع النظام
- -..في البلد حوالي 6ألاف صحفي ..اللي كانوا بيطبلوا مايزيدوش عن 100 أو 200والباقي اما ساكتين ..مش قادرين يقولوا حاجة من الخوف أو بيقولوا وبيتعرضوا للاضهاد ..
- - طيب فين كارنيه النقابة
- - شوف يا بني ..في جيبي الرقم القومي وكارنيه النقابة وكارنيه اتحاد الكتاب ..بس مش هظهرهم الا لما أعرف انتوا مين ..اذا كنتم بوليس أو شرطة عسكرية على عيني وراسي
- - شرطة عسكرية أيه وبوليس أيه ياحاج ؟ .. هو انت ماسمعتش عن الثورة
- - طبعا يا بني سمعت ..شايف شارع قصر العيني اللي قدامك ده ..يوم 25 يناير الساعة 2 الظهر كنت مع شباب زي الفل بنهتف قدام مجلس الوزراء ومجلس الشعب : سلمية ..سلمية ..ولأنهم شباب زي الفل وثوار حقيقيين كل يوم وأنا جاي الشغل أجيب بناتي معايا يشاركوا في الثورة ..ما كنتش خايف عليهم ..لو اتعروا هيلاقوا مليون أخ ليهم في الميدان يستروهم ..وبعد التنحي بناتي كانوا ييجوا من مدينة نصر علشان يشاركوا في تنظيف الشوارع وتجميلها ..كانت الوجوه غير الوجوه والشوارع غير الشوارع ..بص كده للمزبلة اللي تحت رجليك ..والروائح الكريهة اللي خنقانا ..أيام الثورة كنا بنشم الريحة الذكية لدم الشهدا ..دلوقي بنشم ريحة الصنا والقرف .. بذمتكم هو ده ميدان التحرير .. درة القاهرة!!
-هو حضرتك عاوز ثورة خمس نجوم !!..الثورة ثورة ياأستاذ ياصحفي !
- - كانت فعلا في الأول ثورة خمس نجوم..ثورة بالشوكة والسكينة ..علشان كده العالم كله عملنا تعظيم سلام ..دلوقتي السياح خايفين ييجوا والمستثمرين بيهربوا
- - دا كلام ما يقولهوش غير الفلول اللي بيترحموا على زمن مبارك
- - اذا كان فيه خوف على الثورة من فلول مبارك ..ففيه خوف كمان عليها من اللي عاوزين يعملوها مطية ويحققوا بيها مصالحهم !
- - مصالح ايه ياحاج..! الناس اللي انت شايفهم دول على الحواجز سايبين بيوتهم وأشغالهم علشان مصلحة البلد
- - المنظر بتاعكوا بشوف زيه في التليفزيون .. الحواجز اللي عملاها اسرائيل في الضفة الغربية ..علشان كده أنا مصر أعرف أنتوا مين
- - يا حاج دي ثورة وخايفين عليها من البلطجية والفلول
- - وهو البلطجي مش شايل رقم قومي ..على فكرة مبارك كان معاه رقم قومي ..عارف كان الرقم أيه ؟ واحد ..يعني المواطن الأول في مصر .. وأي بلطجي وأي مجرم سوابق معاه رقم قومي ..
- -عارف ياحاج احنا متحملينك ليه ..! علشان سنك ..لولا كده ..
- - كنتم ربطتوني في النخلة ..
- - اتفضل ياحاج .. الناس عاوزه تعدي ..انت معطل المرور
- قلت في غضب وأنا أجتاز الأسلاك الشائكة:
- وانتوا معطلين البلد كلها
-