انور الوراقي يكتب --قابلت الملك الصالح تحت الكوبرى بتاعه!
قابلت الملك الصالح تحت الكوبرى بتاعه!
بقلم انور الوراقي
أنبنى ضميرى المهنى بشراسة، وشعرت بقلبى يتنهنه مع ارتباك واهتزاز فى الأذين البطينى فأصبت بمغص شديد، وأنا أتأمل عبارات ساخرة كتبتها تعليقاً على موضوع الزميل الأستاذ (عبد الفتاح على) المنشور فى جريدة (الفجر) والذى يؤكد فيه أنه رأى (جمال مبارك) يقود سيارته فوق كوبرى 15 مايو فى عز الظهر!
وقتها تسائلت طيب إيه اللى يجبر الراجل اللى المفروض إنه مسجون فى أتخن سجن فى البلد إنه يظهر فوق كوبرى من أزحم كبارى البلد، وسايق عربيته بنفسه ومن غير ما يدارى وشه أو حتى يستخبى فى الكنبة الورانية التى أكدت فى كلام مع بعض الأصدقاء أن (مبارك) و(سوزان) كان يجلسان عليها بالتأكيد، مع وجود (العادلى) و(الشريف) فى شنطة العربية طبعاً!
بصراحة اتهمت الزميل الفاضل بإنه اخترع هذا الموضوع لطرح اسمه على الساحة الإعلامية بقوة، وهو ما حدث بالفعل حيث تتلكك برامج التوك شو والمواقع فى بلدنا لنشر أى هفوة، وتناقل الجميع الخبطة الصحفية التى لم يمتلك صاحبها دليلاً عليها إلا عينيه فقط، من غير حتى كاميرا موبايل توحد الله ليلتقط لنا صورة منغبشة تبل ريق الحقيقة، ولكنه قال فى آخر موضوعه أنه يطالب المسئولين بتصوير ابن الرئيس السابق فى السجن حتى يتضح الكذب من الحقيقة!
طب من غير لف ودوران لماذا لم تطلب بهذا الموضوع منذ البداية وهو حقك كصحفى ومواطن، ولماذا نلجأ لهذا الابتكار الغير مسبوق لنقول أننا رأينا (جيمى) يرتدى قميص وتحته فانلة بيضا، ويقود السيارة ويجلس بجواره واحد برضو لابس قميص وتحته فانلة بيضا كأنهم طقم تحكيم ماتش الأهلى والزمالك الأخرانى، طب ما تقول عاوزين صورة للراجل فى السجن وخلاص، لزومه إيه اللف والدوران، دة حتى مسرحية (المتزوجون) علمتنا أن أقصر طريق بين نقطتين هو الطريق المستقيم، عايز صورة قول عايز صورة!
المهم بعد كل رفضى لكلام الراجل وانتقادى لما رأيته وقتها فيلماً عربياً الغرض منه تسخين الناس على وزارة الداخلية والجيش والحكومة أكتر ماهى سخنانة والناس معاها حق فى حاجات كتيرة طبعاً ولا نصادر على رأى أحد فى أى مطلب، تراجعت بشدة عن هذه الآراء بعد أن مررت بتجربة مماثلة!
كنت مشغولاً بالرد على مكالمة هاتفية مهمة جداً وأنا أقود دراجتى بإيد واحدة مساء الأحد الماضى قرب كوبرى الملك الصالح، لأن سماعة البلوتوث كانت عطلانة الله يحرقها، حتى رأيته أمامى بشحمه ولحمه الملك الصالح بذات نفسه واقفاً أسفل الكوبرى وقد وضع معصميه فى جنبيه وهو يزفر بضيق شديد!
من لغفنتى ضربت فرامل قدمانية فانقلبت الدراجة بى وسقطت أرضاً ووقع الموبايل ونزل منى ميت حتة (علشان كدة معرفتش أصوره شوفتوا الحبكة تبقى إزاى؟) ونهضت أجر أذيال العار، وأنا أتوقع أنى لن أجد الملك الصالح واقفاً فى مكانه، ولكنه للمفاجأة كان لا يزال كما هو!
نظر لى شذراً، وتأملنى للحظات بعد أن امتلأت يدى بالسحجات ووجهى بحمرة الخجل، ومن حسن الحظ إن البنطلونات الجينز مش بتتقطع بسهولة فى المواقف دى كانت تبقى فضيحة، وسألنى:
ـ إنت ساكن فى المنطقة هنا؟
اقتربت منه ومددت يدى لمصافحته بحماس مبالغ فيه، فتجاهل يدى الممدودة إليه وهو ينظر نحوها بقرف، فأجبته:
ـ لا يا مولانا أنا كنت معدى بس، مش حضرتك الملك الصالح؟
تلفت حوله وكأنه يبحث عن شىء ليضربنى به، ثم تراجع ونظر نحوى بغضب وبرطم قبل أن يقول بعصبية:
ـ إنت هاترد عليا الأسئلة يا مملوك؟ هاتجاوب واللا أجيب لك أتابك العسكر يطلعوا ميتـ.....!
قاطعته سريعاً اتقاءً لشره وخوفاً من تعليق راسى على باب زويلة:
ـ تحت أمرك يا مولانا!
قال بغضب هادر:
ـ إنتوا سايبين العيال المتشردين يشموا كُلة تحت الكوبرى بتاعى ليل ونهار، الحكومة دى بتستهبل؟ هو علشان أنا سيبتكم شوية وقولت أتابع الأخبار من بعيد لبعيد تقوموا تسوقوا فيها؟ كل واحد مزنوق فى شمة أو مزنوق فى حاجة تانية ييجى يعملها تحت كوبرى الملك الصالح نجم الدين أيوب يا رعاع؟!
بدأت فى تجميع أفكارى لأرد عليه بدون أن أجرح مشاعره لأخبره أنه مات وشبع موت، وتولت بدلاً منه السيدة (تحية كاريوكا) بشخصية (شجرة الدرة) كما أخبرنا فيلم وا إسلاماه، بس إزاى وهو واقف قدامى بشحمه ولحمه، إلا أن سيارة ميكروباص بيضاء كالتى عبرت لتحول بين زميلنا الفاضل (عبد الفتاح على) وعربة (جمال مبارك) فوق كوبرى 15 مايو، عملت نفس الحكاية وعدت من ما بيننا فجأة ومدلدل منها عيل معمص عمال ينادى:
ـ سيدة.. سيدة.. سيدة!
بعدها فوجئت بأن الراجل مش موجود خالص كأنه فص ملح وداب، حاولت البحث عنه وسألت كل المحلات القريبة والعيال اللى بيشموا كُلة فأنكر الجميع إنه يكون شافه، وأنا هنا لا أملك دليلاً إلا عيناى ونظارتى الطبية، والموضوع جد خطير ولا يمكن السكوت عنه، فهل فعلاً الملك الصالح عايش وحى يرزق وممكن يعمل لنا مشاكل وأزمات بسبب اللى بيحصل تحت الكوبرى بتاعه فالمفروض نلم الدور ونراضيه، واللا هو مات فعلاً ووقتها العيال يشموا كُلة براحتهم؟
أنا من هنا إذن أطالب وزارة الداخلية بحسم الأمور وتبيان الحقيقة فوراً، فإما إعلان وجود الملك الصالح بيننا والكشف عن محل إقامته فوراً، أو إبراز شهادة وفاته وتوفير الكُلة المدعومة للعيال تحت الكوبرى!