انور الوراقي يكتب --بلاش نبقى شعب كاروهات
انور الوراقي يكتب --بلاش نبقى شعب كاروهات!
رجاء من جميع الأخوة الكرام الأعزاء المتظاهرين والثوار والفلول والثورة المضادة والمعتصمين وأصحاب المطالب الفئوية وأخواننا بتوع أنا آسف يا ريس كمان، أبوس على رأس مؤيدى الحكومة الحالية منكم وأيدى رافضيها أيضاً، أقدم أسمى معانى الشكر والعرفان لمَن قالوا نعم للاستفتاء وأفتدى بروحى مَن قال لا، أوطى على رجل كل واحد عايز الدستور أولاً أبوسها، وأهدر حياتى رخيصةً فداءً لكل واحد متمسك بأن تكون الانتخابات قبل الدستور!
فى عرض دين النبى، أبوس إيديكم ورجليكم وروسكم وكل حتة فيكم لو عاوزين، أنا مش عايز حد يتكلم باسمى، يا أسيادنا احترموا رغبتى واستبعدونى أرجوكم بأى طريقة من الهتاف الذى يحكمنا حالياً بدلاً من حكم مبارك البائد وهو الهتاف الشهير: الشعب يريد كذا!
أنا من الشعب دة وشايل جنسيته أباً عن جد الجد ومش هتنازل عنها علشان ماعنديش غيرها ومش هايكون عندى، وعلى فكرة شايلها من زمان يعنى، ومش معنى إنى بقول استثنونى من الحكاية دى إنى مش من الشعب، بس ياريت اللى يتكلم باسم الشعب أو يهتف باسم الشعب دة يكون معاه تفويض من الشعب كله ما دام بيهتف ويقول الشعب يريد كذا!
يا جدعان اكتبوا لافتاتكم زى ما إنتم عاوزين بالطريقة اللى تحبوها بس استبعدونى أنا، مش كل مَن هب ودب يقول لى الشعب يريد كذا.. تفتح قناة فضائية خاصة تلاقى واحد عينيه زايغة من تحت النضارة وجايله كرشة نفس من فرط الحماس، ويهتف ويتفتف فى وش اللى خلفونا وهو يضبح قائلاً: "الشعب يريد الدستور أولاً".. يا عم أرجوك تعدلها وتخليها: "الشعب يريد الدستور أولاً بس الراجل البراوى اللى قاعد يسب لى من قدام الشاشة دة مش معانا فى المشوار"!
تغير القناة لمحطة حكومية، تلاقى واحد تانى سهُن وعامل لك فيها حكيم العصر والأوان، بصوت رخيم وإشارات قاطعة وكلمات تحسسك إنهم مركبين صوت الفنان هانى شاكر على صورته، وهو يكرر بلا ملل ولا كلل: "الشعب يريد الانتخابات أولاً"، ويكاد يحلف بالطلاق تلاتة والحرام من بيته إن الشعب عايز كدة، وهو حر فى الطلاق والحرام، ولكنه برضو مش حر فيا أنا وياريتك يا عم تطلقنى أنا من الموضوع دة زى صاحبك بتاع الفقرة السابقة على طول!
وقِس على ذلك بئا عشرات المطالبات، لدرجة إن كل عشر عمال فى مصنع متضايقين من رئيس مجلس الإدارة سواء بحق أو بغير، يعتصموا وهذا حقهم، ويتظاهروا وهذا حقهم، ويعطلوا العمل، وهذا ليس حقهم ولكن لازم نقول إنه حقهم حتى لا نتهم بمعاداة حقوق الإنسانية والبشرية، ويهتفوا "الشعب يريد إبعاد المدير" يا أسيادنا والله العظيم تلاتة ورحمة أبويا أنا راجل من الشعب دة عشت فيه وعمرى ما سافرت برة مصر، وأكل عيشى هنا، وبيتى وأسرتى وأهلى هنا مش فى حتة تانية، وأنا مش عايز أشيل المدير دة، حد شريكى؟ يا أخواننا أرجوكم محدش يتكلم باسمى!
وإنت يا عم ياللى هناك ياللى متخانق مع مراتك ومنكدة عليك عيشتك، أنا ذنبى إيه تقول الشعب يريد تغيير المدام؟ أنا يا سيدى مش عايز أغير المدام بتاعتى إنت تحكم عليا ليه؟ والحاج اللى قعد 20 سنة فى وظيفته يتقاضى مبلغ مش بطال، وبعدين لما لقى الناس مرتباتها بتزيد قال لازم أزيد أنا كمان ودلوقتى حالاً مش بعد شوية على ما أحوال البلد تتصلح، وأهو لوى دراع وتولع الدنيا باللى فيها المهم أزيد زى زيد وعبيد، ما تعملش حسابى معاك فى الزيادة يا عم الحاج لو تكرمت، أنا يا عم حلو كدة ومش عايز أزيد دلوقتى، لما تهتف على الزيادة وحياة أبوك وأبويا أرجوك تقول: "الشعب يريد زيادة فى المرتب ما عدا كاتب المقالة دى" علشان أنا بوز فقر يا سيدى!
مش عيب أبداً لما يقعد واحد مثقف من النخبة ويمد كرشه قدامى تلاتة متر فى قلب الأستوديو ليقول أنه يرغب فى إقالة وزير البيئة لأن عصفورة شاردة عملتها على الغسيل فى بلكونتهم، هذا رأيه وهو حُر فيه، ولو فيه ناس مفوضينه بإنه يتكلم باسمهم فهم أحرار فى بعض فليتحدث باسمهم ويقول أن جماعة كذا أو حزب كذا مفوضنى بإنى أقول الدستور أولاً، ومولانا الذى يتمسك بأن فرشاة السنان خطيئة كبرى واختراع خبيث برضو من حقه يتمسك ويتشعبط كمان فى رأيه ورأى من وكلوه فى هذا الموضوع، فليتكلم باسمه وباسمهم ومايجيبش سيرتى فى الموضوع، لحد ما تبقوا أغلبية ووقتها سأنصاع لكم وأترككم تتحدثون باسمى احتراماً للديمقراطية، ولكن قبل ذلك الوقت فلن أسمح!
أرجوكم يا ناس أنا لما يكون عندى رأى هاعلنه وهاتكلم بلسانى، أو هافوض اللى يتكلم بالنيابة عنى، وهاحترم رأى الآخرين وتوجهاتهم، وسأوصى مَن ينوب عنى بألا يستخدم كلمة "الشعب يريد" لأننا ماينفعش نتحول لمليون شعب جوة بعض، ماينفعش نبقى شعب كاروهات يا أسيادنا، شعب يريد الحكومة، وشعب لا يريدها، شعب يحب الداخلية، وشعب يلعن سلسفيلها، شعب عايز الأمن والأمان، وشعب عايز البلطجة وضرب النار فى شوارع القاهرة فى عز الظهر، شعب بينام شبعان ويجيله إمساك من كتر الأكل، وشعب جاله نزلة معوية قلبت بإسهال علشان شرب مية ملوثة، كلنا شعب واحد ماتفرقوناش الله يكرمكم وإلا هايكون آخرنا يتفصل بينا قميص والكاروهات أصلها مش موضة اليومين دول، ووقتها ماحدش هايرضى يلبسه وهاتبقى حوسة!