حسام الغمري -يكتب لو عايز تبلبط في بحر السياسة في مصر لازم تلبس مايوة المعرفة البميني الشفاف
النحاس خذل الملك سنة 1942 لما دبابات المستعمر حاصرت قصره وطلبت عودت حكومة الوفد وحاول الملك توحيد القوي الشعبية وتعيين حكومة وحده وطنية ضد رغبة الانجليز .. بس النحاس ندل مع الملك ووافق يرجع رئيس وزارة على ضهر الدبابة البريطانية .. وفضل الملك سنين بيحاول يردهاله
لما محمد نجيب قال نصلح احوال الديمقراطية والجيش يرجع الثكنات .. جمال عبد الناصر حدد اقامته في المرج ونسي تاريخه النضالي ودعمه للثورة ودورة الوطني
الاخوان اتهموا بمحاولة اغتيال عبد الناصر بعد تحالف سابق بينهم وامر عبد الناصر بحل الجماعة ومن يومها بقت بقت محظورة
حرب 56 كانت هزيمة عسكرية وانتصار سياسي لانه متفق مع مصالح القوى العظمي حولة الاعلام المصري الى نصر ساحق على 3 دول وكان مجرد صمود واستبسال
عبد الحكيم عامر كان من اهم اسباب الانفصال عن سوريا ثم زادت صلاحياته وسلطاته بقوانيين تحمل توقيع عبد الناصر بعد ما حاول مرتين انه يبعده عن الجيش وفشل وفي النهاية الجيش كان بتاع عبد الحكيم وعبد الناصر زود له كمان شوية صلاحيات في القطاع المدني وكأن الراجل بيكافئه او بيأمن شره هوه والكابتن شمس بدران
الاعلام المصري حسس الناس اول كام يوم من الحرب في 67اننا خلاص داخلين على تل ابيب وطبعا النتيجة كانت زي ماتش السته واحد بس من غير الواحد
لما عبد الناصر تنحى الشعب حلف يمين طلاق مهو متنحي بالعند في اسرائيل واداله شرعية جديدة مكنته من انه يشتغل صح وطبعا كانت فرصة انه يخلص بقى من عبد الحكيم .. اللي طول الوقت كان جواه هاجس تخلص عبد الناصر من كل شله مجلس قيادة الثورة نفر نفر ماعدا السادات اللي كان عامل قطة
في سبتمبر 70 كان عبد الناصر قوي ومسيطر داخليا واقليميا والروس قشطة معاه وبينه وبين التحرير فقط تحريك حائط الصواريخ مستغلا هدنه روجرز واسرائيل عرضت ترجع سيناء كلها مقابل سلام معاه قال يالقدس والجولان قبل سيناء يا موش لاعب .. وكمان مفيش مفاوضات مباشرة موش انتوا الاشكال اللي يتقعد معاها .. وطبعا في اللحظة دي اللي كان يبدوا فيها منتصرا في حرب الاستنزاف وبينه وبين النصر الحاسم نهاية الهدنه واستئناف القتال وكان وراه حشد دولي مهم يسنده وقت الضرورة .. بالصدفة سبحان الله في الوقت ده ماااااات الراجل وافرحي يا اسرائيل
السادات دخل دخله ناعمه زي عوايدة ولما اتمكن طاح براجل اسمه الفريق اول محمد فوزي ومحمد فوزي ده هوه اللي لم الجيش المتدشدش بعد 67 وخلاه في ظرف 6 شهور يقدر يدافع .. وست شهور كمان يعمل دفاع نشط .. و6 كمان واديها عمليات تعرضيه ليل ونهار على الشط وفي العمق - يعني هجومية - .. واستقال لما اختلف مع السادات سياسيا فكان جزاؤه في النهاية حكم بالاعدام اتخفف للمؤبد بس الحقيقة تم الافراج عنه في 74بس يقعد في بيته وما يفتحش بقه
والثغرة سببها امر من السادات بتحرك غلط للفرقة الرابعة المدرع والفرقة 21 المدرع اللي هما الاحتياطي الاستراتيجي والتحرك الغلط ده كان ضد رغبة الجنرال الشاذلي وقادة الجيش خلانا نخسر 250 دبابة في كام ساعة وضهرنا يتكشف والحرب تخلص 1-1 تعادل ومفاوضاااات مباشرة - واخدش بالك انت من مباشرة دي - وده كان حلم الست جولدا وكان ناصر موش عاوز ينولهولها - يمكن بحجة انهم بيئة - واتفاقية فض اشتباك وكام كيلوا في سيناء ومعظم قواتنا اللي عبرت ترجع وحضن دافي من عم كسينجر ومن وراه امريكا وافرحي يا اسرائيل نفذتي اللي في دماغك وقعدتي مع المصريين
الجنرال الشاذلي العبقري الفذ بعد الحرب خد صابونه زي عم الفريق فوزي بالظبط وم الآخر طلع حظ عبد المنعم رياض كويس انه مات شهيد لانه هوه كمان كان قائد جد وعرفنا اخيرا مصير الراجل الجد في مصر بيبقى ايه - قمة الوفاء الشعبي -المنطوى على ادراك عميق لاغوار الرجال
احزاب وانفتاح فجأة وكل دي مغازلة للست امريكا اللي موش سأله ومقضياها طناش وانضمينا مع السعودية لحلف ضد توغل الاتحاد السوفيتي في العالم الثالث بعد عم الاتحادة السوفيتي ده ما طلع عينه معانا في طلبات السلاح - بالعبيط و برخص التراب وكتير من غير فلوس - وبعت لنا كمان قوات تدافع عن سمانا ومنهم اللي مات وهوه بيدافع عن ارضنا ، وهاتك يا تدريب في قواتنا .. كل ده ليه علشان عم السادات رأيه ان 99 من اوراق اللعبه في امريكا .. وحبايبه طبعا في الرياض قرصتهم برده والقبر والنزيف اللي كان في حرب اليمن يشهد وقبلها فلوس الانفصال واكبر تحيه لعم كمال آدهم