ايجى ميديا

مقال اليوم عبارة عن رسالة، بل قل شهادة أو استغاثة وصلتنى من «نور» «سيدة من الإسكندرية محجبة ملتزمة متزوجة ولديها أولاد». قررت الخروج يوم ٢٤ للتعبير عن رأيها، ونحن منذ ٢٥ يناير أكثر العبارات التى نرددها هى حق التظاهر مكفول للجميع، ولكن يبدو أن هناك من لا يرى هذا. أنا لا أوجه اتهاما لأحد فهذه مهمة العدالة، أما مهمتى فهى نقل ما حدث للسيد وزير الداخلية، كى يحقق فى الموضوع، وأنا أفعل هذا من واقع مهنى فى عدم التستر على جريمة ومن وازع دينى: «إن الساكت عن الحق شيطان أخرس». أنقل لكم الرسالة بعد تخفيف لبعض ما جاء فيها.. حتى إننى حرصت على عدم تغيير اللغة العامية المستخدمة من مرسلتها. كل ما نطلبه منك هو التحقيق فى الموضوع، وهناك شهود عدة مستعدون للإدلاء بشهاداتهم:

«كنت زى غيرى كتير سمعت عن الدعوة ليوم ٢٤ أغسطس من تويتر وفيس بوك، وقررت أن أشارك. أنا مش تابعة لأى حزب أو حركة أنا مع نفسى وبس، عاوزة أشارك أقول وأعلن رفضى لجماعة الإخوان ومرشدهم وتدخلهم فى حكم بلدى.

بعد صلاة الجمعة خرجت زى كتير أوى غيرى توجهت للمنطقة الشمالية، كنا حوالى ٥٠٠ فرد (...) عند أذان المغرب لاحظنا إن فيه تاكسى وقف نزل واحد منه قعد يضرب نار فى الهوا سمعت صريخ وإن واحد اتجرح جريوا بيه على مستشفى القوات المسلحة زى ماعرفت منهم بعد كده إنها رفضت استقباله. بعدها  ناس  طلعوا علينا من قهوة سيدى جابر كانوا عبارة عن مجموعة من الملتحين ماسكين سيوف كبيرة وشوم كان معاهم مجموعة شباب لابسين بنطلونات بس وصدرهم عارى وشكلهم يخوف فعلا.

جريوا علينا وفضلوا يقولوا: «الله أكبر يا كفرة» وضربوا فينا بدون تفريق بين شاب أو بنت أو ست كبيرة أو أطفال ضرب  بكل قوة وعنف بقينا نجرى فى كل اتجاه.. دخلت أنا ومجموعة بنات الجامع نحتمى بيه وأقسم بالله العظيم دخلوا ورانا شدونا من حجابنا ومن شعورنا طلعونا وبقوا يضربوا فى البنات. البلطجية اللى كانوا مع الملتحين كانو بيتحرشوا ويشتموا البنات بأقذر الألفاظ. فى اتنين مسكوا بنت زنقوها على الحيطة وحاولوا يلمسوا كل حتة فيها واستماتت بشدة فى الدفاع عن نفسها ودفعهم عنها.

الموضوع كان تكسير نفسية للبنات محاولة إهانة وتحطيم لينا زى ماتكون رسالة بيحرمونا ننزل تانى.

 جرينا على العساكر اللى عند المنطقة الشمالية كنا هنبوس إيدهم وإحنا بنقولهم افتحوا الحاجز الحديد دخلونا احمونا إحنا بنات وهما بيضربونا هيموتونا أقسم برب العزة رفضوا وقالوا لنا «ماعندناش أوامر بالتدخل». طلبنا النجدة قالوا لنا «مالناش دعوة».

اتعور ناس كتير. أنا مابقتش شايفة إلا إصابات ودم فى وشوش الناس اللى كانت معايا حاولت أصور واحد ملتحى كان ماسك شومة وعمال يضرب فى البنات اسمه الشيخ حسن، عرفت اسمه من اللى معاه كانو عمالين يقولوا له: «الله ينور يا شيخ حسن، اضرب الكفرة اللى عاوزين يخربوا البلد»، لمحنى وأنا بصور قالهم هاتوا بنت (...) دى جريوا ورايا ضربونى على إيدى بالشومة اللى معاهم، الموبايل وقع فخده جريت أنا وواحدة كانت معايا.

طلعنا على أول شارع المشير من ناحية البحر كلنا اترمينا على الرصيف متعورين ومضروبين ومتبهدلين الشباب كان غاضب. قعدوا فى وسط الطريق وكانو بيقولوا حاجة واحدة : «هو إحنا مش مصريين؟ بلاش مصريين مش بنى آدمين عشان يتعمل فينا كده؟ ليه نتهان ونضرب ونتبهدل؟ لأن إحنا نزلنا نقول رأينا بتحضر.

كان جزاؤنا الضرب والبهدلة. كنا محروقين أوى ومقهورين. رغم كل اللى حصل لنا بس كلنا مصممين مش هنسيب حقنا ومش هنسكت وهننزل تانى وتالت مش هيقدروا يخرسوا صوتنا.

معايا ناس كتير شباب عندهم استعداد يروحوا أى حتة يحكوا اللى حصل وناس مصورة كتير». هذه هى رسالة نور أعطتنى أيضاً رقم سيارة شاهين حمراء قامت بدهس عشرة من المتظاهرين.

لم أقل الأرقام هنا لأن هذه هى مهمة الشرطة.

اللهم لا تجعلنا ساكتين عن ذكر الحق.. وها أنا قد بلغت.. الكرة الآن فى ملعب الشرطة.. مع تحياتى الصادقة لرجال الشرطة.