« غادة شريف تكتب : وحياة طنط؟»
عند اشتعال أى فتنة طائفية، ما تعرفش ليه يا أخى دائما ما تتبادر لذهنى نظرية المؤامرة إياها لإلهاء الناس عن شىء آخر.. كتشكيل حكومة مثلاً، خصوصاً بعد أن ثبت أن حادثة كنيسة القديسين كانت مدبرة من فوق.. أنا شخصياً فى أحلك أيام حياتى كنت لا أجد جوارى سوى زملائى المسيحيين.. عندما كنت أعمل فى شركة منتجات طبية عالمية كنت باشتغل زى القراضة، لذلك كانت لا تأتينى الأسافين عند رئيس الشركة إلا من مدرائى المباشرين وكانا مسلمين ويحجان كل عام، وكان دائما كبير مديرى المبيعات المسلم يعد بمساندتى وكشف الحقائق ثم يخذلنى حتى لا يخسرهما، بينما لم يكن يشهد لعملى ويؤازرنى سوى زملائى الأقباط والقليل من زملائى المسلمين... لذلك عزيزى القارئ، نزولا على رغبة العديد من القراء خصوصا الأقباط الذين طلبوا منى مؤخرا أن أعيد نشر ما كتبته بعد حادثة القديسين، اسمح لى أن أعيد النشر بتصرف: «فيه أيام كده بتيجى محملة بأحداث تجعلك تشعر ولو لفترة وجيزة أنك لك جذور.. وأن لبلدك علماً ستبكى بحرقة لو رأيته يهان.. وأن لك صديق مسيحى ياما وقف جنبك فى أزماتك وياما حكيتوا الحكايات وعمركم ما اتكلمتم فى الدين.. افتكر معايا كده: مش زمان لما كنت أنا وإنت فى المدرسة كان أحيانا يحضر معنا زملاؤنا المسيحيون حصة الدين لأن مدرس الدين المسيحى غايب النهارده؟.. وفاكر الواد جورج الذى كان يجلس إلى جوارك فى الفصل؟ ألم يكن يحفظ الآيات القرآنية التى كانت مفروضة علينا فى مادة النصوص؟ وإبن اللذينا مش برضه كان موس وكان بيقف يسمع الآيات زى البرابنط ثم يحصل على النمرة النهائية وإنت تكوع ؟.. طب فاكر لما كنتم بتعملوا نفسكم بتذاكروا سوا عندك فى البيت وأتاريكم قاعدين تشربوا سجاير، بينما مامتك ومامته تدعوان لكم بالنجاح ولا تعلمان بخيبتكم القوية؟.. طب فاكر لما انت وهو بكيتوا فى امتحان التفاضل آخر العام لأنه كان فيه أسئلة خارج المنهج وخرجتوا من اللجنة فوجدتم والدك ووالده مكتفين مدرس المادة فى ركن ونازلين فيه ضرب؟.. طب فاكر فى الجامعة لما إنتم الاتنين أعجبتوا بنفس البنت وانت جريت جرى تقولها إنه مسيحى عشان تسيبها منه وفى الآخر سكت عليكم إنتم الاتنين واتجوزت اللى برقبتك ورقبته؟.. وفاكر لما عربيتك عطلت على كوبرى أكتوبر وضحكت عليه وخليته ينزل يزق.. وكانت الدنيا شمس ففضل يزق لحد ما نفسه اتقطع وانت مستعبط ورافض تبدل معاه، فاكر لما هو بطل زق وراح وقف فى وسط الكوبرى ورفع إيده للسما ودعا: «يا رب يا بتاع المسلمين خده وريحنى منه» ؟.. وفاكر لما كنت بتوصل الشغل متأخر فهو يمضى لك فى الدفتر ولما كنت انت كمان تمضى بداله فى الدفتر لما يتأخر لغاية ما فتن عليكم ابن الحلال عند المدير فخصم لك وخصم له ؟.. ولما جدتك تعبت ودخلتوها المستشفى مش كان بيزورك كل يوم؟ وفى الغرفة المجاورة لكم، ألم يكن فيه جرجس لأنه هو كمان جدته كانت تعبانة؟ وفاكر لما جدك اتصاحب على جده وهمه الاتنين عينهم زقزقت على الممرضة الحسناء وقعدوا يتمنوا لو الشباب يعود يوما ؟.. ويوم ما ابنك ضرب ابنه ألم تذهب تبوس على راسه وتحذره «إوعى تخلى العيال توقع بينا»، وساعتها مش كنت هتموت تبوس على راس مراته لولا مراتك كانت ناقراك من برج المراقبة وزغدتك بكوعها علشان تلم نفسك؟.. طب لما نكون فى الفرح سوا وفى الهم سوا وفى المرض والتعليم والاحتجاجات والاعتصامات سوا.. ده احنا حتى فى رمضان بنتابع ماراثون المسلسلات سوا».. لذلك عزيزى القارئ مهما اللى بالى بالك قالولك إن المسلمين والمسيحيين بيكرهوا بعض فأجبهم بمنتهى الثقة والاستهزاء: «وحياة طنط؟»