منى شعلان تكتب: خذوا الخلاصة من التوك توك
أعلم جيدًا أنى مكروه من كل شئ يسير على الأرض نظرًا لخفة خطوتى وإمكانياتى ومؤهلاتى التى تمكننى أن أمشى فى الممنوع وأطلع على الرصيف وأنط فوق المطبات ولا مؤاخذة أعاكس الستات والبنات الحلوين ومن غير لا مؤاخذة أسابق العربيات دون شهادة ترخيص.
فببساطة لا أحتاج شهادة لإثبات وجودى لأنى موجود بالفعل اسمى ( توك توك) جئت من مكان غير معلوم ويقال أنى لقيط وتربية شوارع وثمرة محرمة لأب لورى بلطجى وأم مقطورة صايعة ولدت بثلاث عجلات وجسمى ضعيف لكن قوتى تفوق عربية شديدة بأربع عجلات.
وظيفتى حل مشكلة أى مواطن من حيث توفير وقته ومجهوده وأعصابه والوصول به إلى هدفه المنشود بعد قضاء ثوان معدودة منفصلًا فيها عن العالم الخارجى متمتعًا بجلسة ( توكتوكية) شعبية تجعله يشعر بمعاناة المجتمع الشعبى ولو لدقائق.
ولا أخفى عليكم أنى حزين فكم من الجرائم التى ترتكب باسمى وأنى برئ منها تمامًا فالبلطجى الحقيقى هو من يقودنى ولكى أثبت لكم حسن نيتى فسوف أخذكم فى جولة ( توكتوكية) لكى أعرفكم على زملائى ( التكاتك) من خلال مبدأ كل ( توك توك) فى الحياة العصرية، اتفضلوا معايا:
1- ( توك توك عبده مخ ): وشعاره ( عايز تبقى ريس عامل الناس كويس) عبده مالوش فى السياسة ومالوش فى الكلام الكتير هو عايز معاملة كويسة واللى يعاملنى كويس ويراعنى قيراط أراعيه 24 قيراط وأنتخبه كمان
2- ( توك توك سعد سنجه) وشعاره ( الأمن قبل الخبز أحيانًا) السنجة لا تفارق سعد أبدًا فهو لا يشعر بالأمان لذلك فهو على استعداد لتثبيت أى شخص يحاول تثبيته ولو برغيف!
3- ( توك توك سمير سوسه) وشعاره ( اللول يخطط والعيال بتتنطط) سوسه خلاص هايتجنن من اللى بيحصل فتنة طائفية وإحتجاجات وإعتصامات وخلاص مفيش إنتاج والاقتصاد بينهار أكيد فى حد مستفيد من اللى بيحصل وبيخطط ياترى من هو اللول؟
4- ( توك توك البرنس) وشعاره ( الحب احساس مش كلام وخلاص) مش أى حد يقول ( بحبك) يبقى بيس لأ الإحساس هوا الأساس غير كده يبقى خطر
5- ( توك توك أبو بطة) وشعاره ( جمال الدنيا بالمال وجمال الآخرة بالأعمال) بس تقول لمين!
6- ( توك توك الزعيم) وشعاره ( الصحوبية مسئولية) مش أى حد يبقى صاحبك وحبيبك عايز تبقى صاحب بجد شيل يامعلم وكون قد المسئولية
7- ( توك توك أبوفلول) وبيسأل ( بنتى إسمها فلول حد ليه شوق فى حاجة؟!
8- ( توك توك العاطفى) وشعاره ( أه لو الأيام بتتكلم) كانت قالت كلام كتير!
9- ( توك توك أبو المفهومية) وشعاره ( عايزين الريس واحد مننا) م الأخر واحد ركب توك توك وشرب من الزير الشعبى وأكل على الطبلية فول وطعميه واللحمة بتزوره كل شهر وبيلبس بنطلون جينز وقميص وليه شنب عايزين ( سى السيد)!
10- ( توك توك الريس ) وشعاره ( مش هيصعب علينا حد علشان مصعبناش على حد ) بس خلاص
وكان هذا نقلا لأفكار سائقى التوك توك من خلال الجمل القصيرة والشعارات التى يضعها كل سائق على (التوك توك ) الخاص به ، كنت معاكم من أمام باركانج التكاتك بمنطقة شعبية شعبية شعبية.