ايجى ميديا

معتز المفتي يكتب: أنا عنصري وده حقي.. على الأقل أنا واضح

أنا عنصرى وده حقى! على الأقل أنا واضح... طبعاً من حقك تتخض وتقول هو ده وقته... ناقصاك إنت كمان تتنطط علينا وإيه لازمته الكلام ده دلوقتى?... ردى الوحيد .. أنا حر .. و ده اللى ح احارب عشانه ...لحد ما اموت و ح اعلمه لولادى ... "الموت فى سبيل ما تؤمن به من أنبل و أشرف النهايات السعيده فى هذه الدنيا" حتى لو كان غلط ... بس غلط ليه !!؟؟

أنا مش غلط ... للأسباب التالية:

أنا ضد محمد حسين يعقوب بتاع غزوة الصناديق  واللى مش عاجبه يطلع بره البلد  ويرجع يعتذر واخواته السلفيين "السلف الطالح" ...  أشرف أبو أنس اللى دعا المسلمين لحرق كنائس إمبابة ورجع فى كلامه لما اتزنق ...برافو هى دى الرجولة.. طب مادول بيرجعوا فى كلامهم أهو  واللى يغيظك يا مؤمن انهم "السلف" ما بيتحمقوش الا علشان ستات مسيحية  كاميليا وعبير ياخى ملعونين وفى 60 داهية قال هما دول اللى ح يرفعوا راية الإسلام  بإعتناقهم ديننا الحنيف الذي يأمر المسلم فى حالة الحرب وهى الحالة التى يصبح فيها العنف مبرر بأن لا يمس من العدو الكهل والنساء و الأطفال والحيوان والزرع حتى الزرع ....إزاى بقى هما صح وأنا ياللى بشتغل فى كار العوالم متمسك بمنطقى وفكرى للأخر أبقى غلط بلا خيبة.

وده اللى خلانى امسك فى خناق واحد سلفى  على موتوسيكل جاوا .. الشكل الطبيعى للبلطجى فى الميدان يوم الجمعه 13-5شبط مع أزهرى رافع يافطه بيطلب دولة مدنيه - استقلال الأزهر الشريف عن الحكومه - لا سلفيه ولا اخوانيه قوم اسكت .... وانا اساساً مستحلف لهم  من ساعة قطع ودن المسيحى فى قنا يا ولاد الهرمه.

مركزين قوى يا أخى  مع كاميليا وعبير طب خديجه وفاطمه !!!! أهل بيتك يا سلفى اللى إنت مش مراعيهم ومبسوط قوى لما فى عز الحر والصيف عندنا حر قوى  تلبسهم النقاب الأسود علشان الإسلام بيأمرنا بكده ... على  فكره مش صح النقاب ده مش من الإسلام كان ليه سبب.

عند غزو التتار لسوريا وتحديداً فى حلب خرجت تلك الفتوى لحماية الناس من إبن تيمية.. فى حلب الستات حلوة قوى يحلو من على حبل المشنقة بصحيح.. مسلمه أو مسيحيه ... ماهى ست !!!...إنسانه يعنى .... ده كان لحمايتهم من الإغتصاب .... وأخر صراعى مع هذا السلفى اللى قعد يبرطم ويقول اى حد ح يغلط فينا فى البلد حنعرفه مقامه ...طيب يا روح امك ..الراجل الأزهرى اللى شايل يافطه قد الداهيه دى وبعيد شويه عن قلب الميدان ح يطلع شايلها على أول منصه جوه الميدان نفسه ... وقد كان بعد 10 دقايق انا بحارب و بأستجير بالناس يطلعوا الراجل على أى منصه ...لحد ما طلع ...فى الأول ماكنوش عايزين كماااان ....لحد ما طلع ونطيت السور الناحيه التانيه ورحت اتفرج عليه مع الناس وولعت سيجاره وانا حاسس بالإنتصار ... كان أحلى نفس سيجاره بأخده ساعتها.     

أنا ضد البابا شنوده بشدة الذى لا يحقن دماء أبنائه والذى لا يخمد الفتنه فى مهدها كأب لشعب من المصريين قبل ما يكونوا مسيحين..هو ازاى ساكت كده ماحدش شايفه ليه فى الشارع بيلم ولاده؟..مالوش دور ليه قبل كده مع الكلب زكريا بطرس اللى أهان سيدنا محمد والصحابه بشده كذا سنه ... هى دى أخلاق المسيح ... اللى هو رسولنا إحنا كمان ؟؟ .... وإزاى سامح ل اللى زى مايكل منير يولعوها بره والحق المسيحين فى مصر بيموتوا والحق الإضطهاد واصل للركب ... والله الإضطهاد عليا و عليك يا إبن عمى وده اللى خلانى أقول كلمتين بس لمسيحى متطرف برضه فى الميدان شايل يافطه ... الحقوناااااا ...حاجه تضحك .... أكتر ناس بتزعل  عليكم أكتر منكم على حرق كنيسه هو احنا ...المسلمين .... وبحزم ...وبلاش تزود فتنه  المفروض ما تبقاش موجوده أساساً ده الروح الحلوه بتاعت الميدان لسه مابردتش وهو راجل كبير فى السن ... سكت والناس اللى واقفه معانا ردوا ورايا على طول .. أه والله ... ده ليلة راس السنه لما الكنيسه فى إسكندريه فرقعت عيطنا وكانت فتحة سنه زى الزفت ... سكت الراجل ما احنا بنتكلم صح .... زى بالظبط انه ماينفعش يبقى عدد الكنائس قد عدد المساجد فى مصر لأن التعداد مش واحد ....المسلمين أكتر ... مصر مش لبنان وما ينفعش تبقى لبنان ....الدوله الرائده فى الشرق الأوسط اللى رجعلها دورها تانى لازم تبقى قويه .... لو كان المسلمين قد المسيحين يبقى الكنائس عددها يبقى زى عدد المساجد ...حق ربنا ...ولا إيه !!!؟

أنا ضد إن المسلم أو المسيحى اللى عايش بره مصر يبقى ليه حق التصويت والإنتخاب  الا بشروط...يعنى مايبقاش قاعد معانا فى البيت وعايش فى بيت تانى ومش مشاركنا الهم ... وكبيره اللى بيسمع كلامه غير كبيرنا اللى بنسمع كلامه ....ومش عارف اللى صايبنا ولا حاسس بيه الا من التليفزيون ... وعلشان بيبعت فلوس .... يبقى عنده حق يمشى كلامه علينا لو إحنا مش موافقين على رأيه ...لاء اللى يحكم البلد اللى ساكن فيها ...الا لو ليه دور فى البلد ... يعنى كل شوية مصريين صحاب يتلموا ويفتحوا مستشفى صغيره ...فصول محو اميه ...مراكز تدريب وتعليم حرف ...ولازم يكون فيه منظمات مصريه كتير جداً فى كل بلد المصرى فيها عايش وبياكل من خيرها لرفع راية بلده اللى هو مش قاعد فيها ...يبقى مصرى بجد بقى ...مش جعجعه وخلاص و طبعاً مايكونش عنده جنسيه تانيه يبقى مصرى وبس  ....

أنا ضد المصرى الذى لا يحارب من أجل ثورة سوريه واليمن وليبيا حتى لو بالكلام والجعجه ... ماهو فلسطين مش ح ترجع من غير سوريه ما تكون معانا ..تاريخياً ثلاث عواصم عربيه تحدد تطور وتخلف العرب .. بغداد وراحت ...القاهره وادينا بنقاوح ... دمشق ومحدش معبرها .... إييييه التناحه دى؟.

و أنا ضد اللى عايزين ينزلوا يعملوا ثوره تانيه يوم 27-5 ماهى كده بقت إيه الهبله اللى ماسكوها طبله ...طب نشتغل شويه بدل ما تخرب خالص ...  أو بلاش حد منكم يقدر يقولى كام مصاب اتعالج من احداث 25 يناير مادام كلكوا بقيتوا قادة الثوره كده بسم الله ماشاء عليكوا إنتوا كنتوا تحلموا أساسأ يبقى الفرعون مبارك بيتجددلو 15 يوم ف 15 يوم و ولاده فى السجن والكبار كلهم مشرفين فى بورتو طره ...كنتوا تحلموا بكده ... أنا عن نفسى ماكنتش أحلم بكده وقد أثبت الجيش المصرى فعلاً بأنه خير أجناد الأرض برغم أخطاء المجلس العسكرى ...علشان بإختصار الجيش مالوش فى السياسه ..الرئيس اللى جاى ح يبقى مدنى يا جدعان ... ده الجيش باع كبيره علشان سيدنا محمد قال خير اجناد الأرض مش ح يضيعوا السمعه دى علشان سيدنا مبارك طبعاً لاء

وختاماً أنا مش ضد اللى مش موافق على رأيى ده ... علشان هى دى الديمقراطيه ... ويارب نعرف نتقبل الإختلاف فى الرأى بينا

لعلها اول خطوات الدوله الديمقراطيه المصريه الجديده ... مصر الجديده

أنا عنصرى وده حقى !!!! على الأقل أنا واضح.... علشان أنا حر

* مخرج و مؤلف