سمر صلاح تكتب -اثبت مكانك
هو احنا احسن من غيرنا و لا احنا فى زمن الفتن ؟ يعنى الفرص اللى موجودة دلوقتى و الميديا و فرص الثقافة المتاحة دلوقتى اكتر و اسرع دى نعمة و لا نقمة ؟
المعلومة دلوقتى بقت اسرع و اسهل و الخبر بيتنقل فى ثانية بصرف النظر صح و لا غلط بس فرصة المعرفة دلوقتى بقت اكبر معنى كدة ان فرص التدين و الالتزام بقت متساوية مع فرص التغيير للاسوأ و الاختيار فى ايدك انت اللى بتختار تعرف ايه .
طيب كام مرة كنت مكسوف تقول انك هتقوم تصلى و لا لازم تروح بدرى عشان محدش يتريق عليك ؟ اصل هما عادى و انت معقد ، "عادى" اللى بنعرف نبرر بيها اى حاجة مالهاش تفسير انا محجبة بس ممكن اقلع الحجاب فى فرحى عادى اصل عادى دة فرح دة يوم يعنى ، ايه المشكلة لما مقطعش قعدة حلوة عشان اقوم اصلى احسن اصحابى يقولوا لى اه يا شيخ اصل هما Open Minded
لكن انت قديم اوى Old Fashion
مش عيب يا جماعة انك يبقى ليكم مبادىء و قواعد ماشيين عليها و بالنسبة لكم خط أحمر عادى انك ترجع بدرى من الخروجة و ليك مواعيد فى البيت عادى انك مبتسلميش بالايد اى ولد عادى انك مش بترقص فى الافراح و مبتحبش تشتم و لا تسمع شتايم الشتيمة هتفضل طول عمرها قلة ادب عمرها ما هتبقى روشنة مهما حصل متغيروش من قواعدكم عشان تبانوا كوول و مش معقدين و مش عيب لما القعدة مش عاجباك تقوم تمشى و لا عيب انك تنسحب من وسط ناس مش شبهك انت مش شجرة مكان ما حد يزرعك هتفضل واقف مش هتتحرك .
ابعدوا عن الاماكن اللى فيها قلع كتير و ابعدوا عن الصور و الفيديوهات الانستجرام اللى فى السيرش ، أبعدوا عن تجمعات البنات و الولاد الغريبة اللى كل حاجة عندهم متاحة و عادى .
ابعدوا عن الناس اللى هزارهم مله قلة أدب و عدم احترام و شتيمة بالام و الاب ابعدوا عن الناس اللى الرفاهية عندهم كبيرة اوى و احنا منقدرش نعمل دة .
قربوا من اللى بيحترموا البيت و الاهل و الدين اللى هيخلونا منفرطش فى اخلاقنا عشان الناس دى فاهمة الرفاعية غلط ابعدوا عن الحاجات دى عشان بتضعف نفوسنا اوى لانها يااما هتخلينا نستهون بالحرام عشان نجاريهم و نقول ما كل الناس بتعمل كدة ما هو اصل الغلط هيفضل غلط حتى لو كل الناس عملته يا هتخلينا نحس اننا احسن من غيرنا فى عز ما احنا مقصرين اوى فى حق ربنا و خطوات رجوعنا بطيئة .
عمرها ما كانت بالمظاهر لا عمر الحجاب كان مقياس ان انا عند ربنا احسن من غيرى و لا مستوى المكان اللى انا عايشة فيه دليل على تربيتى اللى اختارت الحجاب اختارته بحريته ايا كان السبب و القرار مبنى على ايه و اللى اختارت تكون من غير حجاب مش دليل على عدم تدينها (إن الله لا ينظر إلى صوركم و لكن ينظر إلى قلوبكم) ممكن اكون انا محجبة و غيرى لا بس هى عند ربنا احسن منى مليون مرة عمرها ما تتقاس كدة .
احنا فى عرض حد ياخد بايدينا مش يخطفنا من دين لدنيا .
حب اللى يقربك لربنا و يخليك شبعان لاى شهوة و يخليك عمرك ما تقول هما كدة شكلهم احلى انا هعمل كدة هما حياتهم احلى انا همشى فى طريقهم بطلوا تشوف الدين كأبة .
اثبت مكانك عشان انت اللى صح .. استفتى قلبك و ان أفتوك و خليك دايما فاكر :
"لا تستوحشوا طريق الحق لقلة سالكيه".