مقالات > سمر صلاح تكتب - الكل حكيم

كتب إدارة التحرير
4 مارس 2019 12:40 م
-

سمر صلاح تكتب - الكل حكيم


الكل حكيم و لكن ما دامت القصة ليست قصته .. لا تزايد ما دمت لم تختبر .
عمرك ما هتعرف تنصح حد و انت مش مكانه و مش عايش ظروفه فحاول تكون لطيف  .. مهما قلت انك مقدر موقفه او حاسس بيه اللى ايده فى المية مش زى اللى ايده فى النار .
اتعلموا الطبطبة فى كلامكم و ابعدوا عن التأنيب متنظرش على حد لمجرد انك شايف الموضوع من برة اخر حاجة بيحتاجها حد فى ازمة انك تبكته و تقول له يا ريتك ما عملت كدة طبطب متغلطش عشان عمرها ما كانت بشطارتك هى على طول بتعدى بستر ربنا .
متوصلش حد اختار انك تقف معاه فى ازمته انه يقول "يا ريتنى ما حكيت" .
ساعات كتير حاجات صعبة عشناها زمان عدت و عرفنا نكمل بس اللى بيفكرنا بيها كلمة اتقالت فى وقت مكانش المفروض تتقال فيه فوجعت و علمت مش دايما اللى عدى بيخليك مش عارف تعيش النهاردة و تبقى قلقلن و مش قادر تشوف اى امل فى بكرة بسبب كلمة استسلمت لما سمعتها .
متبخلش على حد بكلمة حلوة ممكن تعمر بيها الخراب اللى جوة قلبه لمجرد انك تقول رأيك مهما كان قاسى .. "حرم على النار كل لين هين سهل " .
كلمتك الحلوة فى وقت شدة دين و هيترد لك .. بلاش لما الدايرة تلف و ييجى الدور عليك تلاقى الكل كان مستنى تجيلك عشان كله يبقى حكيم و واعى اتعلم لما تواسى حد مهما كنت شايف مشكلته تافهة و عبيطة هو اكتر واحد عارف وجعه لا هو مكانك و شايف مشكلته من عندك و لا انت مكانه و عايش ظروفه و وجعه و لا مقدر هو خسر ايه .
هى مشاكل الدنيا كدة النهاردة عندى بكرة عندك خليها لما تبقى عندك تلاقى الف ايد تسندك بلاش يفضل حد فاكرلك كلمة قلتها فى عز وجعه زودت بيها همه .. بلاش السم اللى فى اللسان .
زعله من مشكلته مش معناه انه ناقم و لا ساخط على قدره هو بشر من حقه يقع و عنده رفاهية الانهيار فبلاش تقنعه انه مش المفروض يزعل عشان يبقى ايمانه قوى و راضى بقضاءه و قدره زى حضرتك !!!!!
الرضا مالوش علاقة بالالم و الايمان بقضاء ربنا مالوش اى علاقة بألم الفقد و الحزن .
النصيحة فن لا يجيده الكثيرون من اغلى الاشياء فى حياة البشر ان لم تكن اغلاها .. الكل محتاجها و لكن ليس الكل يعطيها و كتير بيعرف ينصح بس اسلوبه يخليك مصمم تكمل فى الغلط مش هقبلها منك و انت بتقولهالى كدة ا!!
النصيحة هدية عظيمة من صديق او محب غير شامت " ولو كنت فظا غليظ القلب لأنفضوا من حولك " .
خلي نصيحتك دايما بينك و بين اللى بتنصحه مش على الملأ و اختار الوقت اللى يقبلها فيه و عنده استعداد يفهمها و خليك عارف انك بنصيحتك يا تشده و تلحقه يا تكمل عليه بلاش السم اللى فى اللسان .
و خليك دايما فاكر "لا تزايد ما دمت لم تختبر".


اصدقاؤك يفضلون