مقالات > سمر صلاح تكتب -الايد اللى توجعك ..إقطعها

كتب إدارة التحرير
24 نوفمبر 2018 1:18 م
-

سمر صلاح تكتب -الايد اللى توجعك ..إقطعها

الايد اللى توجعك ..إقطعها

 

 

فى مصطلح اسمه Kill your Darlings  او بالبلدى كدة الإيد اللى توجعك أقطعها يعنى لو اللبس اللى بتحبه هيأخرك على شغلك عشان تكويه مش لازم تلبسه و لو الأكلة اللى بتحبها هتتعبك متأكلهاش و لو المكالمة اللى جاية لك هتضايقك متردش مهما كانت مهمة !
فى مرحلة فى حياتك أو لحظة معينة لازم تعرف فيها تستغنى عن الحاجات مهما كنت متعلق بيها و فاهم انك مش هتقدر تعيش من غيرها .
هو انت ايه معلوماتك عن الادمان ؟ كلمة ادمان معناها انك تفقد السيطرة على نفسك مع حاجة معينة لما تخلى نفسك عبد لحاجة معينة و ارادتك تبقى ضعيفة مع الحاجة دى أو الشخص دة و بالتالى شخصيتك بتضعف الادمان معناه انك تستمر فى عمل عادة معينة و انت عارف انها بتأذيك من غير ما تحاول تفكر فى احساس الالم و الوجع اللى جاى من الحاجة دى او الحاجات الحلوة اللى متعطلة بسببه بتحس بالمتعة مع تكرار الحاجة الغلط دى لدرجة انك بتفقد السيطرة على اى حاجة ممكن تبعدك عن الشىء دة و طول الوقت هتشوف متعة وجوده بس و طول الوقت متصور انك مش هتقدر تعيش من غيرها بس عارف ... أنت هتتفاجىء انك تقدر تعيش من غيرها طبعا هتزعل و تتضايق و تمر بأعراض الانسحاب بس فى الاخر هتخف و ترجع انسان طبيعى اتعلم تستغنى عن كل اللى بيوجعك .
القصد من كلامى أنك احيانا بتوهم نفسك بحاجتك وحبك ليهم و بتخلق لهم اعذار لمجرد أنهم يكونوا موجودين و بنديهم فرص بس لأمتى ؟
أحيانا لازم ترخى ايدك عن حاجات أتعودت تمسك فيها عشان تقدر تقف و تكمل حياتك بالشكل اللى تستحقه .
محاولة إنك تقدر تبعد عن الحاجات اللى بتحبها لما تفهم انها بتضرك هى من أصعب الحاجات اللى ممكن تواجهك بتحط نفسك وسط النار و انت معترف أنك ضعيف و محتاج تتغير .
"بعد سنة كاملة من أنتظاره يا سمر انا عملت له بلوك" سمعت الجملة دى حرفيا من احدى صديقاتى سنة كاملة مش عارفة تبعد سنة كاملة بتراقبه شبه يوميا و فى لحظة قررت بضغطة واحدة تعمل له بلوك .. و قالت حرفيا:
بعد كل التعب النفسى اللى حصل لى من التجربة دى فهمت ان الحب فعلا بيعمى و لحظة ما بتتشال من علي عنيك غمامة الحب بتكتشف الضلمة اللى كنت عايش فيها و انك كنت أعمى عن حاجات كتير و ان اكتر شىء بتحبه فى حياتك هوأكتر شىء بيأذيك .. حبها ليه منعها من أنها تشوف ان السعادة مش مرتبطة بيه و ان احنا اللى بنحط شروط للسعادة تتوقف على حد تانى .. لما بنحب من غير ما نفكر بنخلى مفيش مشكلة فى حياتنا غير اللى بنحبه و رغم كدة بيكون الاختيار الغلط هو العائق انك تشوف أى حاجة فى حياتك حلوة ..
عملتله بلوك و هى مستوعبة حقيقة ضررها و الكاّبة اللى بيسببها لها أكتر من السعادة اللى كانت بتيجى منه و أن عمرها ما شافت أن فيه ملايين أفضل منه .
عملتله بلوك لأانها اقتنعت انها غلط و دى أول خطوة لتصحيح الغلط خطوة انك تغلب عقلك على عواطفك .. العواطف لو متحكمتش فيها هى اللى هتتحكم فيك .
لازم تتغير عشان مفيش حد بيخسر غيرك و لازم تبقى مقتنع أن أسوأ التجارب اللى بتمر علينا هى اللى هتغير حياتك للأحسن بس لو فهمت أنها تجربة مش نهاية الحياة عشان كدة .
أدى فرص على أد ما بتحب بس لازم تبقى عارف أن مع كل فرصة المحبة هتقل .


اصدقاؤك يفضلون